Häzirki wagtda köp sanly hyzmatlar onlaýn tertibinde amala aşyrylýar. Munuň özi sanly ulgamyň durmuşymyza giňden ornaşýandygynyň aýdyň mysalydyr. Ýakynda bolsa Aşgabat şäher döwlet notarial edarasy raýatlara edilýän hyzmatlaryň hilini ýokarlandyrmak, nobaty hasaba alyş amallaryny ýönekeýleşdirmek we hukuk gullugynyň işgärleriniň hem-de gurama ýüz tutýanlaryň işini ýeňilleşdirmek maksady bilen “Notarial Online Nobat” mobil goşundysyny ýola goýdy. Bu barada “Orient.tm” habar berýär.
Habarda bellenilişi ýaly, bu mobil goşundysynyň kömegi bilen paýtagtymyzdaky notarial edarasynyň gerekli bölümine oturan ýeriňden ýazylyp bolýar. Onuň üçin müşderä diňe adyny, familiýasyny we telefon belgisini görkezmek ýeterlikdir.
Ýazylşykdan soň SMS arkaly nobat belgisi bilen birlikde elektron QR kody gelýär. QR kodunyň kömegi bilen elektron turniketlerinden notariusyň otaglaryna geçip bolýar. Bu hyzmat onlaýn görnüşinde müşdärä öz nobatyny yzarlamaga mümkinçilik berýär. Mundan başga-da, nobatyň ýakynlaşandygy barada awtomatik usulda müşderiniň telefon belgisine SMS habary gelip gowuşýar.
Mobil goşundysyny “Google Play” arkaly öýjükli telefonlara ýükläp bolýar we häzirlikçe bu goşundy diňe türkmen dilinde elýeterlidir. Goşundynyň içinde “Nobat al”, “Häzirki nobaty bil”, we “Meniň nobatlarym” ýaly bölümler bar.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň talyby.
Teswirler