Baky Bitaraplygymyzyň şanly 25 ýyllyk baýramyna ýokary ruhubelentlikde, ykjam taýýarlyk görülýän häzirki buýsançly günlerde welaýat merkeziniň gaýrasynda howalanyp oturan Uly Balkan dagynyň etegindäki «Düzmergen» ýaýlasynda Türkmenistanyň Senagatçylar we telekeçiler birleşmesiniň hem-de onuň partiýasynyň agzasy, telekeçi Halmämmet Amanmämmedowa degişli ýyladyşhananyň açylyş dabarasy aýratyn şatlyk-şowhuna beslendi. Täze ýyladyşhana häzirki zaman dünýäsiniň ýokary hil ülňülerine doly laýyk gelýän, Türkiýäniň we Gollandiýanyň kämil enjamlary bilen birkemsiz üpjün edilendir.
Telekeçi Halmämmet Amanmämmedow şeýle gürrüň berdi. — Balkanabat şäheriniň golaýyndaky «Düzmergen» ýaýlasynda uzak möhletleýin alan 22 gektar ýerimiň 5 gektarynda häzirki zamanyň ösen hil ülňülerine doly laýyk gelýän, öňdebaryjy tehnologiýalar ornaşdyrylan, gök we miwe önümlerini ösdürip ýetişdirmäge niýetlenilen ýyladyşhanamy işe girizdim. Onuň gök önümleri ekmäge niýetlenilen ýerinde oturdan pomidor şitillerim häzirki wagtda hasyl toplamaga başladylar. Onuň ilkinji hasylyny, nesip bolsa, noýabr aýynyň üçünji ongünlüginde ýygnap, ilata elýeterli bahadan hödürläp başlarys. Ýyladyşhanamyň pomidor hasylyny taýýarlamak babatdaky ýyllyk mümkinçiligi 1 müň tonna barabardyr. Nesip bolsa, geljek ýyldan başlap, ýyladyşhanamda pomidor bilen birlikde hyýar, bolgar burçy ýaly gök önümleri hem ösdürip ýetişdirmegi ýola goýmakçy.
Hormatly Prezidentimiziň parasatly baştutanlygynda ýurdumyzyň sebitlerini durmuş-ykdysady taýdan durnukly ösdürmek boýunça giň gerimli özgertmeler amala aşyrylyp, ilatyň ýaşaýyş şertlerini düýpli ýokarlandyrmak, halkymyzy ýokary hilli azyk önümleri bilen üpjün etmek ugrunda ägirt uly işler durmuşa geçirilýär.
Maýa Amanowa,
S.A.Nyýazow adyndaky TOHU-nyň mugallymy.
Şeýle-de okaň:
Balkanabatda täze ýyladyşhana açyldy
Teswirler