Ak bugdaý etrabynda pagta ýygymynyň depgini günsaýyn ýokarlanýar. Şu ýyl Watanymyzyň pagta harmanyna gowaça hasylynyň 43 müň 250 tonnasyny goşmagy belent maksat tutunan etrabyň zähmetkeşleri «ak altynly» atyzlarda yhlasly işleýärler.
Häzirki wagtda «ak altynly» atyzlardaky gowaça hasyly, esasan-da, el güýji bilen ýygnalýar. Pagta ýygyjy tehnikalaryň güýji bilen ýygyljak gowaça meýdanlarynyň ýapragyny düşürmek işleri dowam edýär. Pagta ýygyjy kombaýnlaryň 63-siniň köpçülikleýin atyzlara girmegi bilen ýygymyň depgini has-da ýokarlanýar.
Şu günler gowaça meýdanlarynda çekilýän yhlasly zähmetiň netijesinde Watanymyzyň «ak altyn» harmanlary barha beýgelýär. Bu ugurdaky asylly işler Gökdepe etrabynda hem guramaçylykly alnyp barylýar. Etrabyň ekerançylyk meýdanlarynyň 6500 gektarynda ýetişdirilen bol gowaça hasylyny ýitgisiz ýygnap, harmana goşmak işine jogapkärli çemeleşilýär.
Häzirki wagtda pagta ýygymy möwsüminiň guramaçylykly alnyp barylmagy öňünden görlen taýýarlyk işleri bilen aýrylmaz baglanyşyklydyr. Möwsümiň öňýanynda ýygnalan hasyly harmana daşamaga gatnaşjak awtoulaglaryň sany, tehnikalara hyzmat ediş toparlaryň möçberi we işlejek ýerleri kesgitlendi, pagta ýygyjy kombaýnlar doly taýýarlyk hatarynda goýuldy, harmanhanalardyr kabul ediş nokatlarynyň taýýarlygyna ähmiýet berildi. Bu zatlar pagta ýygymynyň depginine oňaýly täsirini ýetirýär.
Üstümizdäki şanly ýylda Watanymyzyň «ak altyn» harmanyna pagtanyň 12550 tonnasyny goşmagy maksat tutunan etrabyň hasyl ussatlarynyň arasynda höweslendiriş çäreleri hem guralýar.
«Türkmenistan — Bitaraplygyň mekany» ýylynyň bereketli gowaça hasylyny ýygnap almak möwsümine ýokary guramaçylykly girişen Sarahs etrabynyň edermen pagtaçy babadaýhanlary atyzlardan hasyly gysga möhletde ýygnap almagyň aladasy bilen işleýärler. Hasyl ussatlary hormatly Prezidentimiziň daýhanlar üçin döredip beren giň mümkinçiliklerinden netijeli peýdalanyp, ýygymyň her gününi üstün¬liklere besleýärler.
Etrabyň «Watan» daýhan birleşiginiň zähmetsöýer pagtaçylary 1140 gektar meýdanda bol hasyl ýetişdirip, ony gysga wagtda ýygnap almagy maksat edinýärler. Hojalykda kärendeçi toparlaryň 6-sy bolup, olaryň her birinde ýetişdirilen hasyly çalt we zaýasyz ýygnap almakda önjeýli zähmet çekilýär. Ýygnalan hasylyň kabul ediş harmanhanalaryna bökdençsiz ugradylmagy gündelik tabşyrygyň ýerine ýetirilmegini üpjün etmäge ýardam edýär.
Arzuwgeldi Kulyýew,
S.A.Nyýazow adyndaky TOHU-nyň mugallymy
Şeýle-de okaň:
Ekişiň täze möwsümi
“Hasyl – 2019”
Ilkinji organiki önüm sergä çykaryldy
ALTYN GÜÝZE ŞAN GETIREN SENÄM SEN!
Öri meýdan tokaý zolaklaryny döretmegiň ähmiýeti
Teswirler