7-nji fewralda Türkmenistanyň futzal boýunça zenanlar ýygyndysy Merkezi Aziýanyň Futbol assosiasiýasynyň çempionatynyň — «CAFA Women’s Futsal Championship-2024» ýaryşynyň çäginde sebit derejesindäki çempionatyň ýer eýesi bolan Täjigistanyň ýygyndy topary bilen duşuşdy. Duşenbede guralan üçünji tapgyryň duşuşygy 4:1 hasabynda türkmen toparynyň ýeňşi bilen tamamlandy.
Ýaryşda Türkmenistanyň, Täjigistanyň, Eýranyň, Özbegistanyň hem-de Gyrgyzystanyň ýygyndy toparlarynyň çykyş edýändigini bellemek gerek.
Häzirki wagtda 9 utuk toplan Eýranyň ýygyndy topary öňdeligi eýeleýär. Ikinji orunda Gyrgyz Respublikasy (6 utuk), üçünji basgançakda bolsa Türkmenistanyň we Özbegistanyň (her biri 3 utuga eýelik edýär) ýygyndy toparlary barýar. Täjigistan bolsa heniz utuk toplap bilmedi.
Düzgüne laýyklykda, zenanlaryň ýygyndylarynyň arasynda geçýän «CAFA – 2024» futzal çempionatynyň ýeňijileri bir aýlawda guraljak ýaryşyň — toparlaryň her biriniň birek-birek bilen duşuşmagynyň netijesinde toplan utuklarynyň esasynda kesgitlener. Has takygy, iň köp utuk toplan topar çempion bolar.
Aýnur RAHMANOWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler