“Parahatçylygyň ýaş çaparlary” atly akyl-paýhas bäsleşiginiň nobatdaky möwsümi başlady.
Sişenbe güni türkmen milli diplomatiýasynyň mekdebi bolan Halkara gatnaşyklary institutynda Ýaş diplomatlar mekdebiniň guramagynda “Parahatçylygyň ýaş çaparlary” atly akyl-paýhas bäsleşiginiň II möwsüminiň 1-nji oýny geçirildi.
Bäsleşik 5 menzilden ybarat bolup, oýun “Gadymy Marguşdan Parfiýa çenli: Parahatçylyk sungatynyň siwilizasion ýörelgeleri” temasy boýunça geçirildi. Akyl-paýhas bäsleşigine jemi ýurdumyzyň zehinli okuwçylaryndan 16-sy gatnaşdy. Bäsleşigiň netijesinde 4 sany okuwçy bäsleşigiň indiki tapgyryna gatnaşmaga hukuk gazandy.
Belläp geçsek, akyl-paýhas bäsleşiginiň bu möwsüminiň 1-nji oýnunda 3-nji menzilde soraglar we jogaplar iňlis dilinde alnyp baryldy. Bu bolsa mekdep okuwçylarynyň dil baýlygyny artdyrmaga ýardam berdi.
Bäsleşigiň indiki tapgyryna gatnaşmaga hukuk gazanan okuwçylar:
- Yhlas Hallyýew (Maýa Kulyýewa adyndaky türkmen milli konserwatoriýasynyň ýanyndaky ýörite sazçylyk mekdep-internatynyň 11-nji synp okuwçysy)
- Wepa Rozyýew (Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy)
- Hezretaly Myradow (Aşgabat şäheriniň 32-nji orta mekdebiniň 11-nji synp okuwçysy)
- Dawut Gezerow (Mary welaýatynyň Mary şäheriniň iňlis dili we ynsançylyk ugurly okuw derslerini çuňlaşdyrylyp öwredilýän ýöriteleşdirilen welaýat mekdebiniň 11-nji synp okuwçysy)
KAKAGELDI AKMYRADOW,
Türkmenistanyň Daşary işler ministrliginiň
Halkara gatnaşyklary institutynyň talyby
Teswirler