Ýurdumyzda häzirki wagtda ylym-bilim babatynda täze talaplar bildirilýär. Ýagny, bilimi çuňňur öwretmek üçin okadylyşyň, täze hünär öwredilişiniň dürli tehnologiýalary gözlenilýär. Şol sanda ýurdumyzda “Türkmenistanda daşary ýurt dillerini okatmagy kämilleşdirmegiň Konsepsiýasynyň” kabul edilmegi türkmen ýaşlarynyň dünýä dillerini çuňňur öwrenmekleri üçin hukuk esaslary bolup durýar.
Hormatly Prezidentimiziň diýarmyzyň bilim ulgamyna aýratyn üns bermegi ýaş nesliň kemala gelmeginiň diňe bir bilim derejesine däl-de, eýsem ýaşlaryň edep-terbiýesiniň hem kämilleşmegine oňaýly täsir edýär. Bilim ulgamynyň dürli basgançaklarynda hem bolşy ýaly, bilim terbiýeçilik işlerini alyp barmakda hem birnäçe täzelikler, dünýä ylmynyň gazananlary durmuşa ornaşdyrylýar. Ýurdumyzda, bagtyýarlyk döwrüniň ösen şahsyýetini kemala getirmekde bilim – terbiýeçilik işleri türkmen halkynyň ahlak ýol-ýörelgelerine, milli däp-dessurlaryna, şeýle hem halk mugallymçylyk taglymatlaryna esaslandyrylýar. Şol sanda biziň hem institutymyzda daşary ýurt dillerini öwrenýän dilçi mugallymlar, terjimeçiler taýýarlanylýar. Olaryň öwrenýän kärlerine kämil bolup ýetişmekleri hem-de, dünýä dilleriniň birnäçesinde suwara gürläp bilýän hünärmenler bolup ýetişmekleri üçin köp aladalar edilýär. Mälim bolşy ýaly, häzirki wagtda hem institutymyzda dili öwrenilýän ýurtlar bilen baglanyşykly dil hepdeliklerini geçirmek däbe öwrüldi. Şeýle hem ýokary okuw mekdebimizde “Iň oňat terjime”, “Iň oňat makala” atly bäsleşikler geçirilmegi munuň aýdyň mysalydyr. Geçirilýän bäsleşikler esasynda guralýan dürli medeni çäreler talyplaryň barlag işlerini, ylmy gyzyklanmalaryny artdyrýar. Bu bolsa olaryň dil öwrenmek ukyplarynyň işjeňleşmegine alyp barýar. Mundan başga-da, Bitaraplygymyzyň 25 ýyllyk toý-dabaralarynyň öň ýanlaryndaky günlerde geçirilýän dürli baýramçylyk çärelerinde ýaşlar Türkmenistan döwletiniň halkara gatnaşyklarynda gazanan üstünliklerini, Watanymyza bolan buýsançlaryny öwrenýän dilinde beýan edýärler. Institutymyzda şeýle çäreleriň yzygiderli geçirilip durmagy talyp ýaşlaryň daşary ýurt dilini we şol dilde gepleýän halklaryň medeniýetini, taryhyny öwrenmeklerine uly gyzyklanma döredip, döredijilikli işlemäge ruhlandyrýar.
Laçyn HUDAÝGULYÝEWA,
Döwletmämmet Azady adyndaky
Türkmen milli dünýä dilleri institutynyň
Ýewropa dilleri we edebiýaty fakultetiniň
2-nji ýyl talyby
Teswirler