Berkarar döwletiň täze eýýamynyň Galkynyşy döwründe Türkmenistan özüniň nurly geljegini ýaş nesilleriň zehini, gujur-gaýraty we ylym-bilimi bilen berkidýär. Hormatly Prezidentimiz Serdar Berdimuhamedowyň taýsyz tagallalary netijesinde, ýurdumyzda ýaşlar baradaky döwlet syýasaty täze belentliklere göterildi. Bu günki gün türkmen ýaşlary diňe bir jemgyýetiň hereketlendiriji güýji däl, eýsem mukaddes Garaşsyzlygymyzyň we hemişelik Bitaraplygymyzyň gazananlaryny dowam etdiriji, döwletimiziň sarsmaz sütünidir. “Watan diňe halky bilen Watandyr! Döwlet diňe halky bilen döwletdir!” diýen parasatly şygar astynda amala aşyrylýan tutumly işler her bir ýaş nesliň kalbynda uly buýsanç we jogapkärçilik duýgusyny oýarýar.
Ýurdumyzyň ähli künjeklerinde gurlup ulanmaga berilýän döwrebap bilim ojaklary, ýokary tehnologiýaly barlaghanalar we sport desgalary ýaşlaryň hemmetaraplaýyn kämilleşmegi üçin döredilen giň mümkinçilikleriň aýdyň subutnamasydyr. Sanly ykdysadyýete we innowasion ösüş ýoluna düşen Türkmenistanda ýaşlaryň döwrebap ylymlary özleşdirmegine, dilleri öwrenmegine we halkara bäsleşiklerde döwletimiziň baýdagyny belende götermegine aýratyn ähmiýet berilýär. Döwletimiz tarapyndan ýaş maşgalalaryň durmuş şertlerini gowulandyrmak, ýaş hünärmenleri goldamak we olaryň döredijilik başlangyçlaryny höweslendirmek ugrunda amala aşyrylýan çäreler “Berkarar Diýarda ýaşlar bagtyýar” diýen jümläniň durmuş hakykatyna öwrülendigini görkezýär.
Türkmen ýaşlary milli terbiýäni, pederlerimiziň asylly ýörelgelerini we watansöýüjilik duýgularyny özünde jemleýän kämil şahsyýetler bolup ýetişýärler. Gahryman Arkadagymyzyň we Arkadagly Gahryman Serdarymyzyň ýaşlara goýýan uly ynamy, olary täze taryhy eýýamda belent sepgitlere ruhlandyrýar. Arkadag şäheriniň we beýleki uly taslamalaryň gurluşygynda ýaş hünärmenlerimiziň gatnaşmagy, döwlet dolandyryşynda we ykdysadyýetiň dürli pudaklarynda olara möhüm orunlaryň ynanylmagy ýurdumyzyň geljeginiň ygtybarly ellerdediginiň nyşanydyr.
Umuman aýdylanda, bagtyýar ýaşlar — Türkmenistanyň şöhratly geljeginiň, parahatçylygyň we rowaçlygyň kepilidir. Hormatly Prezidentimiziň ýaşlar baradaky amala aşyrýan syýasaty her bir türkmen ýaşlarynyň öz ukybyny amala aşyrmagyna we Watanyň ösüşlerine öz mynasyp goşandyny goşmagyna itergi berýär. Bu gün türkmen ýigitleri we gyzlary agzybirlikde, asuda we bagtyýar durmuşyň hözirini görýärler hem-de öz zähmeti, ylmy-bilimi bilen eziz Diýarymyzyň dünýädäki abraýynyň has-da belende galmagyna hyzmat edýärler.
Gülzada GURBANGYLYJOWA,
Aşgabat şäheriniň 78-nji ýöriteleşdirilen
orta mekdebiniň mugallymy.
Teswirler