Gazagystan Respublikasynyň Aktau şäherinde karatedo boýunça çagalaryň arasyndaky Merkezi Aziýanyň çempionaty tamamlandy. Ýaryşa gatnaşan Türkmenistanyň milli ýygyndy toparyna 27 türgen wekilçilik etdi. Türkmen wekiliýetiniň üstüni 4 tälimçi we 4 emin ýetirdi. Türkmen karateçileri medallaryň 10-syna eýe çykdylar.
Türkmen ýygyndysy 3 altyn medala mynasyp boldy. Aşgabat şäherindäki 32-nji orta mekdebiň 4-nji synp okuwçysy Alina Yewdokimowa 8-9 ýaşly türgenleriň arasynda 25 kilograma çenli agram derejesinde çykyş edip, altyn medala mynasyp boldy. Balkanabat şäherindäki 20-nji orta mekdebiň 5-nji synp okuwçysy Medine Gaýlyýewa 10-11 ýaşly türgenleriň arasynda 40 kilograma çenli agramda tutluşyp, birinji orny eýelemegiň hötdesinden geldi. Ahal welaýatynyň Gökdepe etrabyndaky 1-nji orta mekdebiniň 6-njy synp okuwçysy Öwezmyrat Sapardurdyýew bolsa 10-11 ýaşly çagalaryň arasynda kata boýunça altyn medal aldy.
Ildeşlerimiz kümüş medallaryň 2-sini gazanmagyň hötdesinden geldiler. Gökdepe etrabyndaky 14-nji orta mekdebiň 6-njy synp okuwçysy Baýramgeldi Atadurdyýew 10-11 ýaşlylaryň kata boýunça ýaryşynda hormat münberiniň ikinji basgançagyna çykdy. Balkanabat şäherindäki 1-nji orta mekdebiň 6-njy synp okuwçysy Aýşa Ilgeldiýewa 10-11 ýaşly türgenleriň arasynda kata ýaryşynyň kümüş medalyna mynasyp boldy.
Milli ýygyndy toparymyzyň agzalary bürünç medallaryň 5-sine eýe çykdylar. Paýtagtymyzdaky 45-nji orta mekdebiň 8-nji synp okuwçysy Rahat Ataýew 12-13 ýaşly türgenleriň arasynda kata görnüşinden üçünji orny eýelese, Mary welaýatynyň Türkmengala etrabyndaky 16-njy orta mekdebiniň 6-njy synp okuwçysy Gunça Tagansähedowa şol görnüşden 10-11 ýaşlylaryň arasynda öňdäki üçlügi jemledi. Aşgabat şäherindäki 2-nji orta mekdebiň 6-njy synp okuwçysy Aleksandra Guzina 10-11 ýaşlylaryň arasynda 35 kilograma çenli agramyň bürünç medalyny gazandy. Mary welaýatynyň Baýramaly şäherindäki 1-nji orta mekdebiň 7-nji synp okuwçysy Kyýasgeldi Ýazmyradow 12-13 ýaşly türgenleriň arasynda 40 kilograma çenli agramdaky bäsleşigi bürünç medal bilen jemledi. Şeýle üstünlige eýe bolmagy Aşgabat şäherindäki 61-nji orta mekdebiniň 8-nji synp okuwçysy Alymuhammet Kakalyýew hem başardy. Ol bu netijesini 12-13 ýaş türgenleriň arasynda guralan 50 kilograma çenli agaram derejesindäki bäsleşikde gazandy.
Wepa MAKSADOW,
Türkmenistanyň Döwlet energetika
institutynyň talyby.
Teswirler