Türkmenistanyň Prezidentiniň döwleti we jemgyýeti hemmetaraplaýyn sazlaşykly ösdürmek ugrunda alyp barýan syýasaty ähli sebitleri gurşap alýan we ilatyň abadan durmuşda ýaşamagynyň bähbidine üstünlikli durmuşa geçirilýän maksatnamalaýyn resminamalarda öz beýanyny tapýar.
Şunuň bilen baglylykda, “Berkarar döwletiň täze eýýamynyň Galkynyşy: Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasynyň” esasy maksady ýurdumyzyň ykdysady kuwwatyny pugtalandyrmaga, dünýäniň ösen ýurtlarynyň derejelerine ýetirmäge, bazar ykdysadyýetine tapgyrlaýyn geçilmegine, raýatlarymyzyň iş üpjünçiligini we halkymyzyň durmuş derejeleriniň ýokarlandyrylmagyna gönükdirilendir.
Soňky ýyllarda ýurdumyzda bolup geçen durmuş-ykdysady özgertmeler ilatyň sanyna, jyns we ýaş düzümine, ilatyň ýurduň çäginde ýerleşiş aýratynlyklaryna täsirini ýetirdi. Şundan ugur alyp, 2017-nji ýylda Türkmenistanyň Prezidenti “2022-nji ýylda Türkmenistanyň ilatynyň we ýaşaýyş jaý gorunyň uçdantutma ýazuwyny geçirmek hakynda” Karara gol çekipdi. Resminama laýyklykda, çäreleriň senenama meýilnamasy tassyklanylyp, ilat ýazuwyna taýýarlyk görmek we ony geçirmek üçin jogapkär ministrliklerdir-pudak edaralary kesgitlenildi.
Şu ýylda “Ilat ýazuwy — 2022: Jebislik, Bagtyýarlyk, Röwşen geljek” şygary bilen geçiriljek ilat ýazuwy Watanymyzyň Garaşsyzlygyna eýe bolanyndan bäri üçünjisidir. Mundan öň 1995-nji we 2012-nji ýyllarda ilat ýazuwlary üstünlikli geçirilipdi. Ilat ýazuwyna taýýarlyk görülýän, onuň geçirilýän döwründe dünýäde toplanan öňdebaryjy tejribeler hem-de milli ykdysadyýetiň aýratynlyklary nazara alynýar. Ilat ýazuwynyň esasy maksady, ýurdumyzyň ilaty, demografiki düzümi we ilatyň durmuş şertleri barada döwlet hem-de jemgyýetçilik ösüşiniň strategiýasyny üstünlikli durmuşa geçirmek üçin zerur bolan doly maglumat almakdan ybaratdyr. Çünki, ýurdumyzyň ilatynyň sany, paýlanyşy we häsiýetnamalary baradaky maglumat onuň ykdysady, durmuş we demografiki ýagdaýyny kesgitleýär. Munuň özi, ýurdumyzyň we ilatyň hal-ýagdaýyny ýokarlandyrmaga gönükdirilen esasy syýasaty we maksatnamalary işläp düzmek üçin zerur bolup durýar.
Döwlet dolandyryşynyň we jemgyýetçilik gurluşynyň ähli ulgamlaryna halkara standartlaryna laýyk gelýän täze innowasion tehnologiýalaryň yzygiderli ornaşdyrylmagy bilen sanly ulgama geçmegiň üstünlikli dowam etdirilýän döwründe ilat ýazuwynyň sanly ulgamlaryň mümkinçiliklerinden peýdalanmak arkaly geçirilmegi häzirki wagtda sanlylaşdyrma we sanly ulgama geçmek işleri ileri tutulýan ugra öwrülendigi bilen baglanyşyklydyr. Sanly tehnologiýalaryň işjeň ulanylmagy öňde durýan ilat ýazuwynyň esasy täzeligi bolup, ýazuwyň planşetleri ulanmak arkaly elektron usulda geçirilmegi ýazuw kagyzlaryny çalyşmaga mümkinçilik berer.
Uçdantutma ýazuw döwletiň parahatçylyk wagtynda amala aşyryp biljek iň çylşyrymly we giň gerimli çäreleriniň hatarynda bolmak bilen, bu çäreleriň durmuşa geçirilmegi wagtlaýyn ýazuw işgärlerini işe çekmegi hem-de taýýarlamagy, ähli öý hojalyklaryny gurşap almagy, aýry-aýry adamlar boýunça maglumatlary ýygnamagy, şeýle-de alnan maglumatlara seljerme geçirip, olary çap etmegi talap edýär. Ilat ýazuwyna taýýarlyk görülýän döwrüň esasy wezipeleri salgylar binýadyny emele getirmekden, ilatly ýerleri sanaw we ýazuw bölümçelerine we ýazuw bölümlerine bölmekden, ýazuw geçirmeli işgärleri seçip almakdan ybaratdyr. Jemlenen maglumatlar esasynda amala aşyryljak ylmy çaklamalar geljekde ýurdumyzyň halk hojalygynyň ähli ugurlarynda pudak edaralarynyň işini has netijeli meýilleşdirmäge mümkinçilik berer.
Umuman, ilat ýazuwyny geçirmek babatda ýurtlaryň arasynda tejribe alşylmagy, bu ugurda dürli meseleler boýunça bilimleriň derejesiniň ýokarlandyrylmagy halkara deňeşdirilýän bahalary üstünlikli emele getirmegiň girewidir. Türkmenistanyň ilatynyň we ýaşaýyş jaý gorunyň uçdantutma ýazuwynyň maglumatlary geljekde ýurdumyzy we onuň sebitlerini durmuş-ykdysady taýdan ösdürmegiň milli maksatnamalaryny, konsepsiýalary taýýarlamakda giňden ulanylar. “Ilat ýazuwy — 2022: Jebislik, Bagtyýarlyk, Röwşen geljek” şygary bilen geçiriljek ilat ýazuwy halkymyzyň asudalygyny, parahatlygyny, agzybirligini, jebisligini üpjün etmekde hem-de röwşen geljegimizi nazarlaýan beýik maksatlara ýetmekde möhüm waka bolar.
Jebisligiň goýnunda, bagtyýarlygyň eşretini görüp, röwşen geljegi nazarlaýan türkmen halkynyň bagtly durmuşda ýaşamagy üçin bimöçber aladalary edýän hem-de ähli ösüşleriň, özgerişleriň gözbaşynda duran Gahryman Arkadagymyzyň şeýle-de hormatly Prezidentimiz Arkadagly Serdarymyzyň janlary sag, ömürleri uzak bolsun! Halk bähbitli, umumadamzat ähmiýetli beýik işleri hemişe rowaçlyklara beslensin!
Döwran GULLYÝEW,
Mary welaýatynyň Serhetabat şäher Jemagat
hojalygy müdirliginiň pasportçysy, hukukçy.
“Ilat ýazuwy — 2022: Jebislik, Bagtyýarlyk,
Röwşen geljek” atly şygaryň awtory
Teswirler