Türkmen halkynyň milli ruhunyň beýany bolan Magtymguly Pyragynyň döredijiligi dünýä nusgalykdyr. Ol medeniýetimiziň, dilimiziň gymmatly hazynasydyr. Onuň döredijiliginiň ýyllar geçdigiçe ynsan köňüllerine saçýan şuglasy has-da nurlanýar. Çuň many-mazmunly goşgulary okyjylary özüne çekýär. Şonuň üçin hem şahyryň «söz mülki» dünýämiziň bahasyz gymmatlygyna öwrüldi. Beýik akyldaryň öňe sürýän pikirlerinde esasy ugur adam terbiýesi bolup, adamyň kämil bolmagy, ylym-bilim öwrenmegi hakyndaky pikirler beýan edilýär.
Magtymguly Pyragynyň döredijiligi türkmen halkynyň ruhy sütünleriniň biridir. Iki ýarym asyr gowrak wagt bäri türkmen halkynyň dürli syýasy, ykdysady, durmuşy öwrülişikleri başdan geçirendigine garamazdan, Magtymguly Pyragynyň giň mazmunly, çuň manyly şygryýetiniň gymmaty günsaýyn ýokarlanýar, syrly pikirleri bolsa, dünýä alymlarynyň ünsüni özüne çekýär.
Magtymgulynyň goşgulary halka ruhy lezzet berýär. Edebiýatyň taryhynda şygryýeti bilen öçmejek yz goýan Magtymguly Pyragynyň çeper döredijiligi bahasyna ýetip bolmajak edebi gymmatlykdyr. Dana şahyryň paýhasyndan dörän dürdäne setirler özüniň çuňňur manysy we çeperçiligi bilen her bir ynsanyň kalbyna gözellik çaýýar. Türkmeniň agzybirligini, jebisligini arzuwlan Magtymguly Pyragy özüniň çeper döredijiligi bilen dünýä halklarynyň kalbynda-da müdimilik orun aldy.
Türkmen halkynyň beýik akyldary, şahyry Magtymgulynyň döredijiliginiň agramly bölegi asyrlardan-asyrlara aşyp, nesillerden-nesillere gelip ýetmek bilen, ruhy gymmatlyk hökmünde ynsanlaryň kalbyna çuňňur ornaşyp, ösüp gelýän ýaş nesliň, medeniýetiň kämil derejede ösdürilmegine, şahsyýetleri terbiýelemäge özboluşly goşant goşýar.
Dursun JUMAGELDIÝEWA,
Aşgabat şäher medeniýet müdirliginiň
Merkezleşdirilen kitaphanalar ulgamynyň
Büzmeýin kitaphana şahamçasynyň
esasy kitaphanaçysy.
Teswirler