Özbegistanyň paýtagty Daşkent şäherinde “Tashkent Water Week 2026” atly halkara forum geçirilýär. Goňşy ýurduň hökümetiniň başlangyjy bilen guralýan bu çäre Merkezi Aziýada barha güýçlenýän suw meselesine garşy bilelikdäki çözgütleri ara alyp maslahatlaşýan ilkinji uly möçberli meýdança bolar.
Howanyň üýtgemegi we ilatyň çalt artmagy netijesinde “suwy nireden üpjün etmeli?” diýen mesele diňe tehniki mesele bolmak bilen çäklenmän, eýsem tutuş sebit üçin möhüm strategik ugra öwrülýär.
Forumyň baş maksady — serhetara suw serişdelerini dolandyrmak bilen bagly meseleleri dartgynlylyk çeşmesinden hyzmatdaşlygyň täze mümkinçiliklerine öwürmekdir. Esasy ara alnyp maslahatlaşyljak ugurlar şulardan ybarat:
- Ynanyşmak diplomatiýasy: serhetara suw paýlanyşygy boýunça umumy çözgütleri tapmak
- Sanly suw: suw serişdelerini takyk hasaba almak üçin IT-tehnologiýalary we hemra gözegçilik ulgamlaryny ulanmak
- Agrar özgertmeler: suw ýetmezçiligi şertlerinde suwaryş ulgamlaryny döwrebaplaşdyrmak hem-de oba hojalygynda ekologik standartlary ornaşdyrmak
“Merkezi Aziýa we global suw aýlanyşygy” diýen şygar astynda geçiriljek forum diňe pikir alyşmak bilen çäklenmän, amaly we tehnologik çözgütleri işläp taýýarlamaga gönükdiriler. Gatnaşyjylar azyk howpsuzlygyny üpjün etmek, suw ýetmezçiligi şertlerinde ilaty azyk bilen üpjün etmegiň ýollary, pudagara hyzmatdaşlyk hem-de “suw–energiýa–azyk” baglanyşygyny durnukly ösüşiň möhüm elementi hökmünde ara alyp maslahatlaşarlar.
Suw hepdeliginiň dowamynda suw hojalygy boýunça halkara olimpiada hem geçiriler. Sebit häzirki wagtda täze nesil suw hünärmenlerine, diplomatlaryna we inženerlerine uly zerurlyk duýýar.
Türkmenistan we onuň goňşy ýurtlary üçin suw serişdelerini netijeli dolandyrmak ykdysady durnuklylygyň esasy şertleriniň biridir. Daşkentde geçiriljek bu forum Merkezi Aziýa ýurtlarynyň global suw meselelerinde öz bähbitlerini bilelikde goramagyna ýardam edip, geljekdäki halkara suw sammitlerine taýýarlykda möhüm ädim bolar.
Akgül ALLAÝAROWA,
Türkmen oba hojalyk institutunyň
4-nji ýyl talyby.
Teswirler