Häzirki wagtda dünýäniň ösüş bady intellektual baýlyga, ýagny ylymly-bilimli adam kapitalyna esaslanýar. Türkmenistanda hem «Döwlet diňe halky bilen döwletdir!» – diýen sarsmaz ýörelgeden ugur alnyp, geljegimiz bolan ýaşlaryň iň döwrebap derejede sowat almagy üçin ägirt uly işler durmuşa geçirilýär. Sowatly ýaşlar diňe bir öz maşgalasynyň däl, eýsem tutuş bir milletiň, Watanymyzyň iň gymmatly hazynasydyr.
Bilimli bolmak — diňe bir maglumatlary ýat tutmak däl, eýsem şol maglumatlary seljerip bilmek we täze başlangyçlara öwürmek ukybydyr. Şoňa görä-de, ýurdumyzyň ýokary we orta hünär okuw mekdeplerinde häzirki zaman dünýäsiniň iň aktual ugurlary bolan emeli aň, blokçeýn tehnologiýalary, maglumatlaryň howpsuzlygy we sanly taslamalary dolandyrmak ýaly hünärlere aýratyn orun berilýär. Ýaşlarymyzyň halkara ders bäsleşiklerinde, innowasion taslama ýaryşlarynda gazanýan üstünlikleri türkmen biliminiň dünýä derejesinde bäsleşige ukyplydygynyň aýdyň subutnamasydyr.
Häzirki döwür ýaşlardan diňe bir nazary bilimi däl, eýsem amaly başarnyklary hem talap edýär. Şol sebäpli, ýurdumyzda ýaş hünärmenleriň startup başlangyçlaryny goldamak, olaryň döredijilik we oýlap tapyjylyk ukyplaryny höweslendirmek üçin ähli amatly şertler döredilýär. Ekologiýa taýdan arassa önümçilik, «akylly» tehnologiýalar we sanly hyzmatlar ulgamynda ýaşlaryň hödürleýän täzeçil çözgütleri milli ykdysadyýetimiziň diwersifikasiýalaşmagyna ýardam edýär. Çünki kämil bilimli ýaş nesil islendik kynçylygy döredijilikli ýol bilen çözmäge we döwletiň kuwwatyny has-da artdyrmaga ukyplydyr.
Watanymyzyň geljegi ýaşlaryň ylymda gazanýan sepgitlerine, olaryň dünýä garaýşynyň giňligine we watançylyk ruhuna baglydyr. Bilimli ýaş — bu Watanyň güýjidir, döwletiň sarsmaz sütünidir. Her bir täze açyş, her bir kämil taslama bizi täze belentliklere, parahat we bagtyýar durmuşa alyp barýar.
Ýaş nesliň ylym-bilim dünýäsine aralaşmagyna, döwrebap bilim alyp, Watana peýdaly şahsyýetler bolup ýetişmegine hemişe atalyk aladasyny edýän Milli Liderimiz Gahryman Arkadagymyzyň hem-de bu asylly ýörelgeleri dowam etdirýän Arkadagly Gahryman Serdarymyzyň janlary sag, ömürleri uzak bolsun! Ýurdumyzyň geljegi bolan ýaşlar üçin şeýle giň mümkinçilikleri açyp berýän döwlet Baştutanlarymyzyň ähli beýik tutumlary elmydama rowaçlyklara beslensin!
Bibi ÖWEZOWA,
Aşgabat şäheriniň 78-nji ýöriteleşdirilen
orta mekdebiniň mugallymy.
Teswirler