Häzirki döwrüň ykdysady gatnaşyklarynda maliýe ulgamy ýurduň ösüş depginini kesgitleýän esasy mehanizmleriň biri hökmünde çykyş edýär. Maliýe serişdeleriniň netijeli dolandyrylmagy, bank ulgamynyň durnuklylygy we maýa goýum mümkinçilikleriniň giňelmegi ykdysady ösüşiň berk binýadyny emele getirýär. Şonuň üçin hem maliýe ulgamy ykdysadyýetiň “gan damarlary” hökmünde häsiýetlendirilýär.
Durnukly maliýe ulgamy önümçilik, gurluşyk, hyzmatlar we telekeçilik ýaly pudaklaryň sazlaşykly ösüşine ýardam berýär. Bank-karz gatnaşyklarynyň kämilleşdirilmegi täze taslamalaryň durmuşa geçirilmegine, kiçi we orta telekeçiligiň goldanylmagyna giň ýol açýar. Şeýlelikde, maliýe serişdeleri ykdysady dolanyşykda netijeli ulanylyp, täze iş orunlarynyň döredilmegine şert döredýär.
Sanly bank hyzmatlarynyň ösdürilmegi hem maliýe ulgamynyň döwrebaplaşmagynyň möhüm ugrudyr. Elektron tölegler, uzakdan hyzmat etmek mümkinçilikleri, sanly hasaplaşyk ulgamlary ykdysady gatnaşyklaryň tizligini artdyrýar. Bu bolsa ykdysadyýetiň açyklygyny üpjün etmek bilen birlikde, maliýe akymlarynyň aýanlygyny hem güýçlendirýär.
Şeýlelikde, maliýe ulgamynyň kämilleşdirilmegi ykdysady durnuklylygyň, maýa goýum işjeňliginiň we umumy ösüşiň esasy şertleriniň biridir. Güýçli maliýe binýady bolmazdan, ykdysadyýetiň uzak möhletleýin ösüşini üpjün etmek mümkin däldir.
Atajan JUMAKULYÝEW,
Türkmen döwlet maliýe institutynyň
III ýyl talyby.
Teswirler