Gazagystanyň Aktau şäherindäki Türkmenistanyň Konsullygynyň binasynda Türkmenistanyň Prezidenti Serdar Berdimuhamedowyň täze «Türkmenistanyň Bitaraplygy — parahatçylygyň we ynanyşmagyň aýdyň ýoly» atly täze kitabynyň dabaraly tanyşdyrylyş çäresi geçirildi. Bu barada Türkmenistanyň habarlar portaly habar berýär.
Çärä türkmen wekiliýeti bilen birlikde Ş. Esenow adyndaky Hazar döwlet tehnologiýalar we inžinerçilik uniwersitetiniň talyplary gatnaşdylar. Duşuşygyň dowamynda bu täze neşiriň ýurduň ösüşiniň esasy tapgyrlaryna düýpli düşünmäge we häzirkizaman geosyýasy şertlerinde hemişelik Bitaraplyk syýasatynyň hakyky mazmunyna göz ýetirmäge mümkinçilik berýän esasly işdigi bellenildi.
Çykyş edenler kitabyň Türkmenistanyň Bitaraplyk derejesiniň halkara jemgyýetçiligi tarapyndan ykrar edilmeginiň 30 ýyllygy mynasybetli çap edilendigini nygtadylar. Otuz ýylyň dowamynda bu doktrina milli gymmatlyklaryň aýrylmaz bölegine öwrülip, döwlete däpler bilen innowasion ösüşi sazlaşykly utgaşdyrmaga mümkinçilik berdi.
Kitapda ýurt içindäki durnuklylygyň we dünýä açyklygynyň ykdysadyýetde, ulag-aragatnaşygynda, medeniýetde we halkara diplomatiýada gazanylan uly üstünlikleriň binýady bolup durýandygy bellenýär.
Tanyşdyrylyş dabarasy parahatçylyk we hoşniýetli goňşyçylyk ýörelgeleriniň häzirki nesil hem-de sebitiň geljekki ösüşi üçin örän ähmiýetlidigini tassyklady. Foruma gatnaşyjylar bu eserdäki pähim-paýhaslary öwrenmäge uly gyzyklanma bildirip, Türkmenistanyň ygtybarly halkara hyzmatdaş hökmündäki ornuny bellediler.
Duşuşygyň ahyrynda myhmanlara türkmen milli tagamlary hödürlendi, bu bolsa halklaryň arasyndaky sarsmaz dostlugyň we medeni bitewiligiň nyşanyna öwrüldi.
Bibihajar KERIMOWA,
Türkmenistanyň Döwlet energetika
institutynyň mugallymy.
Teswirler