Halkara parahatçylyk we ynanyşmak ýylynda belleniljek Türkmenistanyň hemişelik Bitaraplygynyň 30 ýyllygy mynasybetli «Arkadag» gazetiniň redaksiýasy, Türkmenistanyň Magtymguly adyndaky Ýaşlar guramasynyň Merkezi geňeşiniň Arkadag şäher geňeşi bilelikde neşir işlerinde bezegçi dizaýnerleriň arasynda «Dizaýnerleriň eserlerinde — Bitaraplygyň waspy» atly döredijilik bäsleşigini yglan edýär.
Berkarar döwletiň täze eýýamynyň Galkynyşy döwrüniň ajaýyplyklary kalplara ylham, joşgun berýär. Zehinli ýaş metbugat bezegçiler, dizaýnerler döredijiliginde asuda, abadan Watanymyzy, eşretli zamanamyzy, dost-doganlygy wasp edýärler. Metbugat sahypalaryndaky bezeg işleri bilen döwrüň sesine ses goşýarlar.
Arkadagly Gahryman Serdarymyzyň ýurdumyzy mundan beýläk-de gülledip ösdürmek ugrunda öňde goýýan belent wezipelerinden we ýaşlara bildirilýän uly ynamyndan ugur alyp geçirilýän döredijilik bäsleşiginiň baş maksady Watanymyzyň hemişelik Bitaraplygyny, parahat durmuşymyzy dürli bezegler, dizaýn işleri, kollažlar arkaly wasp etmekden, şu ugurda meşgullanýanlary höweslendirmekden hem-de aýratyn zehinlileri ýüze çykarmakdan ybaratdyr.
Bäsleşige gatnaşyjylar metbugatda çap bolmadyk eserlerini «Dizaýnerleriň eserlerinde — Bitaraplygyň waspy» diýen ýazgy bilen hödürläp, onuň ýanyna özleri baradaky maglumatlary-da goşup (işleýän ýa-da ýaşaýan ýeriniň salgysy, telefon belgisi), «Arkadag» gazetiniň redaksiýasyna (Arkadag şäher Arkadag şaýoly 28 Arkadag şäheriniň Medeniýet toplumy) ýa-da arkadag_gazeti@sanly.tm elektron salgysyna ugradyp bilerler.
Hödürlenýän işler we awtor baradaky gysgaça maglumatlar bildiriş-habar gazetde çap edilen gününden başlap, şu ýylyň 5-nji dekabryna çenli guramaçylyk topary tarapyndan kabul ediler. Eserlere guramaçylar tarapyndan düzülen eminler topary baha berer.
Bäsleşik Halkara Bitaraplyk baýramynyň ýubileý senesiniň öňüsyrasynda jemlener. Ýeňijilere Türkmenistanyň Magtymguly adyndaky Ýaşlar guramasynyň Arkadag şäheriniň geňeşi tarapyndan Hormat haty we gymmat bahaly sowgatlar, şeýle-de tapawutlanan eserleriň awtorlaryna höweslendiriji baýraklary gowşurylar.
Habarlaşmak üçin telefon belgilerimiz: +993 12 57-39-66, +993 12 57-39-69.
Teswirler