Türkmenistanda “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasy” esasynda 87 sany jemgyýetçilik-medeni desga gurular.
Jemgyýetçilik durmuşynyň we infrastrukturanyň ösüşini gowulandyrmaga gönükdirilen bu desgalaryň hatarynda 4 sany hassahananyň, 12 sany sagaldyş öýleriniň we merkezleriniň, 17 sany çagalar bagynyň, 32 sany mekdebiň, 4 sany medeniýet öýüň, 12 sany suw arassalaýyş desgasynyň we 6 sany lagym suwuny arassalaýyş desgasynyň gurluşygy meýilleşdirilýär.
Mundan başga-da, döwrebap inženerlik infrastrukturasy bolan lagym ulgamlarynyň, gaz geçirijileriniň, awtomobil ýollarynyň, elektrik geçirijileriniň we telefon ulgamlarynyň gurulmagy göz öňünde tutulýar.
Ahal welaýatynda 19 sany desga, şol sanda mekdepler, çagalar baglary, saglyk öýleri we merkezleri gurular. Bu ýerde 850 km suw geçirijileriniň, 560 km awtomobil ýollarynyň, 260 km gaz geçirijileriň we 500 km elektrik geçirijileriniň gurulmagy meýilleşdirilýär.
Balkan welaýatynda 14 sany desga, şol sanda iki sany hassahana, iki saglyk öýi we merkezi, medeniýet öýleri, mekdepler we suw arassalaýyş desgalary gurular. Bu ýerde 368 km awtomobil ýollary we 150 km gaz geçirijisi ulanylmaga berler.
Daşoguz welaýatynda 19 sany desga, şol sanda mekdepler, çagalar baglary, saglyk edaralary we suw arassalaýyş desgalary gurular.
Lebap welaýatynda 16 sany täze desga gurulyp, bir hassahananyň durky täzelener.
Mary welaýatynda 18 sany desga, şol sanda bir hassahana, üç sany aglyk öýi we merkezi, üç çagalar bagy, alty mekdep we bäş suw arassalaýyş desgasynyň gurluşygy meýilleşdirilýär. Bu ýerde ýaşaýyş jaýlarynyň meýdany 147 müň m²-e ýetip, awtomobil ýollarynyň uzynlygy takmynan 400 km bolar.
Maksatnama ulag we telekommunikasiýa infrastrukturasynyň ösdürilmegini öz içine alyp, ýokary tizlikli ýollaryň gurluşygy, logistika hyzmatlarynyň gowulandyrylmagy hem-de aragatnaşyk ulgamlarynyň giňeldilmegi göz öňünde tutulýar.
Teswirler