Ýaşlaryň Taryhy Mirasa Gyzyklanmasy Artýar: Aşgabatta Etnografiýa Sergisine Gezelenç Guraldy
TSTP-nyň Ýaş telekeçiler merkeziniň we TMÝG-nyň Meýletinçiler merkeziniň meýletinçi ýaşlary Türkmenistanyň Döwlet medeniýet merkeziniň Döwlet muzeýiniň Etnografiýa muzeýine gezelenç etdiler.
Bu gezelençiň maksady ýaşlaryň milli mirasymyza bolan söýgüsini artdyrmak, ata-babalarymyzyň ýaşaýyş-durmuş däplerini tanyşdyrmak we türkmen halkynyň gadymy medeni baýlyklaryny ýaş nesle wagyz etmek boldy.
Etnografiýa merkezinde gatnaşyjylara juwaz, jykyr, sokyr daşy we degirmen ýaly oba-hojalykda ulanylýan däp bolan milli gurallar görkezildi. Şeýle hem, maldarçylyk we balykçylyk bilen bagly eksponatlar ýaşlaryň aýratyn ünsüni çekdi.
Sergide däp bolan gara öý, alabaý itleri, ahalteke atlary, oba-hojalyk gurallary, ekerançylyk enjamlary, geçmiş döwürlere degişli neşir nusgalary, dürli döwürlere degişli ýaraglar, oba durmuşyny beýan edýän sahnalar, şeýle hem halkymyzyň baý medeniýetini beýan edýän şaý-sepler, milli saz gurallary we däp-dessurlara degişli eksponatlar ýerleşdirildi.
Bu gezelenç ýaşlaryň medeni mirasymyza bolan buýsanjyny artdyrdy, olaryň şahsy ösüşine we watançylyk duýgularynyň güýçlenmegine uly goşant boldy. Şeýle çäreler ýaşlaryň ruhy-ahlak taýdan baýlaşmagyna möhüm täsir edýär.
Sergä gatnaşan meýletinçi ýaşlar bu çäreden uly täsirlenme bilen çykyp, milli gymmatlyklary öwrenmegiň we wagyz etmegiň zerurdygyny nygtadylar. Şeýle medeni çäreleriň dowamly geçirilmeginiň ýaş nesliň ösüşinde möhüm ähmiýete eýe boljakdygyny bellediler.
Teswirler