11-nji iýunda ýurdumyzyň Daşoguz we Balkan welaýatlarynyň bugdaý meýdanlarynda orak möwsümine badalga berildi. 29-njy maýda geçirilen Ministrler Kabinetiniň mejlisinde Türkmenistanyň Prezidenti Serdar Berdimuhamedowyň beren ak patasyndan ruhlanan ekerançylar ösdürilip ýetişdirilen bereketli bugdaý hasylyny gysga wagtda we ýitgisiz ýygnap almagy maksat edinýärler.
Daşoguz hem-de Balkan welaýatlarynda oragyň başlanmagynyň öňüsyrasynda welaýat we etrap häkimlikleriniň wekilleriniň, tejribeli agronomlaryň, mehanizatorlaryň, kärendeçi gallaçylaryň gatnaşmagynda önümçilik-okuw maslahatlary geçirildi. Olaryň gün tertibine orak möwsümini guramaçylykly geçirmek, oňa gatnaşýan ähli tehnikalaryň sazlaşykly işlemegini üpjün etmek meseleleri girizildi. Okuw maslahatlaryna gatnaşanlar oba zähmetkeşleri baradaky hemişelik aladasy, obasenagat toplumynyň tehniki taýdan yzygiderli enjamlaşdyrylmagyna we döwrebaplaşdyrylmagyna gönükdirilen özgertmeleri, ekerançylaryň mynasyp durmuşda ýaşamagyna, netijeli zähmet çekmegine döredilen şertler üçin Türkmenistanyň Prezidentine tüýs ýürekden hoşallyk bildirdiler.
2025-nji ýylda ýurdumyzyň gallaçy daýhanlarynyň 690 müň gektar ýerden azyklyk bugdaýyň 1 million 400 müň tonnasyny ýygnap almagy meýilleşdirýändiklerini bellemek gerek. Demirgazyk sebitiň ekerançylarynyň öňünde 145 müň gektar bugdaý ekilen meýdandan 265 müň tonna hasyl almak wezipesi goýlandyr. Günbatar sebitiň gallaçylary barada aýdylanda, olaryň döwlet öňündäki borçnamasy 50 müň gektar ýerden 80 müň tonna bugdaý hasylyny almaga deňdir.
Teswirler