Bitaraplyk diňe bir syýasy ýagdaý däl, ol halklaryň arasyndaky ynamyň we parahatçylygyň ruhy binýadydyr. Gazagystanyň Aktau şäherindäki Türkmenistanyň Konsullygynyň binasynda “Halkara parahatçylyk we ynanyşmak ýyly” mynasybetli dabaraly çäre geçirildi. Bu waka diňe bir diplomatik ähmiýete eýe bolman, eýsem halklary birleşdirýän ruhy köpri hökmünde hem ýatda galdy.
Türkmenistanyň Gazagystan Respublikasyndaky Konsullygynyň habar bermegine görä çäräniň myhmanlarynyň hatarynda Mangistau welaýatynda ýaşaýan türkmen diasporasynyň wekilleri, şeýle-de Aktau şäherindäki Ş.Ýesenow adyndaky Hazar tehnologiýalar we inženerçilik döwlet uniwersitetinde bilim alýan türkmen talyplary boldy. Olar dabaranyň dowamynda diňe bir Watanyň halkara derejesindäki parahatçylyk döredijilik syýasaty bilen däl, eýsem onuň medeni baýlygy bilen hem ýakyndan tanyşdylar.
Dabarada Birleşen Milletler Guramasynyň Baş Assambleýasy tarapyndan yglan edilen “2025-nji ýyl – Halkara parahatçylyk we ynanyşmak ýyly” baradaky kararnamanyň ähmiýeti hem aýratyn bellenildi. Türkmenistanyň Bitaraplyk ýörelgeleriniň diňe bir sebitde däl, eýsem bütin dünýäde durnukly ösüşe, ynanyşykly gatnaşyklary ösdürmäge uly goşant goşýandygy nygtaldy.
Medeniýet bilen syýasatyň sazlaşygyny duýdurýan serginiň dowamynda türkmen halkynyň nepis el işleri, halyçylyk sungaty, şaý-sepler we surat eserleri görkezildi. Bu sungat nusgalary gatnaşyjylarda uly täsir galdyryp, dabaranyň ruhy aýratynlygyny has-da güýçlendirdi.
Dabaranyň ahyrynda gatnaşyjylar Türkmenistanyň hemişelik Bitaraplygyny wasp edýän täsirli wideoşekiller bilen tanyşdylar. Bu pursatlar olarda Watana bolan buýsanç duýgusyny güýçlendirdi hem-de ýurduň parahatçylyk syýasatynyň çuň many-mazmunyny ýene bir gezek duýdurdy.
Ylham AÝMÄMMEDOW,
Türkmenistanyň Telekommunikasiýalar we
Informatika institutynyň talyby.
Teswirler