Halkara parahatçylyk we ynanyşmak ýylynda 9 müň 200 gektar meýdanda ýazlyk ýeralmany ýetişdirmegi meýilleşdiren Ahal welaýatynyň zähmetsöýer daýhanlary ekişe taýýarlykly girişip, ony depginli alyp barýarlar. Ýörite saýlanyp alnan ýerlerde bu önümiň ýerli toprak-howa şertlerine laýyk gelýän görnüşleri ekilýär. Agrotehniki çäreleriň öz wagtynda we ýokary hilli geçirilmegi, suw tutmagyň, mineral dökünler bilen goşmaça iýmitlendirmegiň talabalaýyk ýola goýulmagy hasyl ussatlaryna ýeralmanyň bol hasylyny ösdürip ýetişdirmäge mümkinçilik berer.
Bahar paslynyň ilkinji günlerinde guramaçylykly başlanan ekiş işlerinde mehanizatorlar ýokary işjeňlik görkezýärler. Önümçilik birleşiginiň ussahanalarynda tehnikalardyr enjamlaryň irki möhletlerde taýýarlanyp goýulmagy ýazky ýeralma ekişiniň öz wagtynda we ýokary hilli geçirilmegine ýardam edýär.
Geçen ýyl ýeralma ýetişdirmekde görelde görkezen Kaka, Ak bugdaý, Bäherden we Gökdepe etraplarynyň ekerançylary häzirki jogapkärli möwsümde-de tapawutlanýarlar. Agzalan etraplarda ýöriteleşdirilen kämil tehnikalardyr gurallaryň hyzmatyndan netijeli peýdalanylýar. Ýeralma ýetişdirmegiň döwrebap usullaryny ulanmakda we damjalaýyn suwaryş ulgamyny giňden ornaşdyrmakda Kaka etrabynyň hojalyklarynda alnyp barylýan işler has-da guwandyryjydyr. Etrabyň «Edermen pagtaçy» daýhan hojalygynda 100 gektar meýdanda damjalaýyn suwaryş ulgamy giňden ornaşdyrylýar. Üstümizdäki şanly ýylda bu hojalykda ýeralmanyň Niderlandlardan getirilen tohumy ekilýär.
Milli ykdysadyýetimizde ähmiýetli orny eýeleýän oba hojalyk pudagynda işleriň üstünlikli alnyp barylmagyna giň ýol açýan, ýurdumyzda azyk bolçulygyny döredýän daýhanlary hemmetaraplaýyn goldaýan Milli Liderimiziň hem-de hormatly Prezidentimiziň janlary sag, belent başlary aman, ömürleri uzak, tutumly işleri rowaç bolsun!
Dörtguly ANNAMYRADOW,
Aşgabat şäherindäki Agrosenagat
orta hünär okuw mekdebiniň
talyby.
Teswirler