Türkmenistan bilen Owganystanyň arasyndaky medeni we ykdysady gatnaşyklar soňky ýyllarda has-da pugtalandy. Goňşy ýurtlaryň arasyndaky hyzmatdaşlygyň anyk subutnamalary hökmünde Türkmenistan — Owganystan — Pakistan — Hindistan gaz geçirijisi, elektrik geçiriji ulgamy, şeýle-de Kerki-Ymamnazar-Akina-Andhoý ugry boýunça demir ýol şahasy görkezilýär. Bu taslamalar diňe bir sebit durnuklylygyna we ykdysady ösüşine däl, eýsem, iki ýurduň arasyndaky gatnaşyklaryň ösdürilmegine möhüm goşant goşýar.
2024-nji ýylyň 5-nji martynda Türkmenistanyň Söwda-senagat edarasynyň binasynda geçirilen Türkmen-Owgan işewürler maslahatynyň çäklerinde guralan göçme birža söwdalary hem iki ýurduň arasyndaky ykdysady gatnaşyklaryň ösýändiginiň aýdyň subutnamasydyr. Bu çärede dürli ýurtlardan gelen telekeçiler iki ýurduň işewür toparlary bilen hyzmatdaşlyk mümkinçiliklerini ara alyp maslahatlaşdylar.
Şeýle gatnaşyklary has hem berkitmek maksady bilen, ýakynda Aşgabat şäherinde Owganystan Respublikasynyň önümleriniň sergisi we işewürlik maslahaty geçiriljekdigi mälim edildi. Türkmenistanyň Ministrler Kabinetiniň sanly ulgam arkaly geçiren mejlisinde wise-premýer N.Atagulyýew tarapyndan bu çäreleriň taýýarlyk işleri barada hasabat berildi.
23-27-nji fewral aralygynda geçirilmegi meýilleşdirilýän bu çärelerde Owganystanyň haryt öndüriji kompaniýalarynyň we Türkmenistan bilen hyzmatdaşlyga gyzyklanma bildirýän işewürleriň gatnaşmagy göz öňünde tutulýar.
Bu sergi we maslahat ikitaraplaýyn gatnaşyklary ösdürmäge gönükdirilen möhüm ädimdir. Onuň dowamynda Türkmenistanyň öndürýän önümlerini Owganystana eksport etmek, özara söwda gatnaşyklaryny giňeltmek ýaly meseleler ara alnyp maslahatlaşylar. Şeýle-de bu çäre işewürlik gatnaşyklarynyň täze ugurlaryny açyp, ykdysady hyzmatdaşlygyň mundan beýläk-de ösdürilmegine şert döreder.
Türkmenistan bilen Owganystanyň arasyndaky hyzmatdaşlyk diňe bir ykdysady taýdan däl, eýsem, medeni taýdan hem berkidilýär. Şu çäreler iki ýurduň arasyndaky dostluk we hoşniýetli goňşuçylyk gatnaşyklarynyň täze derejesine ýetmegine ýardam eder. Şeýle başlangyçlar diňe bir häzirki mümkinçiliklerden peýdalanmaga däl, eýsem, uzak möhletleýin hyzmatdaşlyk gatnaşyklarynyň ösdürilmegine-de uly itergi berer.
Mähriban AŞGABADOWA,
S.A Nyýazow adyndaky Türkmen
oba hojalyk uniwersitetiniň talyby.
Teswirler