2024-nji ýylda Türkmenistan ykdysadyýet, oba hojalygy, sanly tehnologiýalar we halkara hyzmatdaşlyk ýaly ugurlarda gazanan ajaýyp üstünlikleri bilen dünýä jemgyýetçiliginiň üns merkezinde boldy. Bu üstünlikler milli ösüş strategiýasynyň netijelidigini görkezýär. Bilim we sport ulgamlaryndaky ösüşler bolsa ýaşlaryň geljege bolan ynamyny berkidýär.
Türkmenistanyň Telekommunikasiýalar we informatika instituty bilim, ylym we tehnologiýa ugurlarynda birnäçe möhüm çäreleri geçirip, halkara abraýyny ýokarlandyrdy. Bu çäreler ýurduň innowasiýa ugurly ösüşine goşant goşdy.
Türkmenistanyň ösüşi, sebitiň hem-de dünýäniň durnukly ösüşine uly goşant goşýan döwlet hökmünde ýurdumyzy has-da öňe çykarýar. 2025-nji ýylda bu belent maksatlary has-da rowaçlandyrmak üçin täze mümkinçilikleriň açyljagyna ynanýarys.
Informatika olimpiadasy
Türkmenistanyň Telekommunikasiýalar we informatika instituty, sanly bilim ulgamyny ösdürmek baradaky döwlet konsepsiýasyny durmuşa geçirmek maksady bilen, 2024-nji ýylyň 22-nji aprelinde “Informatika” boýunça ýokary okuw mekdepleriniň arasynda olimpiada geçirdi.
Bäsleşige ýurdumyzyň 15 ýokary okuw mekdebinden talyplar gatnaşyp, sanly maglumat-kommunikasiýa tehnologiýalaryny ulanmak arkaly amaly meseleleri çözmekde öz ukyplaryny görkezdiler. Çäräniň esasy maksady talyplaryň ukyp-başarnyklaryny ýüze çykarmak, sanly tehnologiýalara gyzyklanma döretmek we başarjaň ýaşlary ýüze çykarmak boldy.
Açyk breýn-ring bäsleşigi
Türkmenistanda Halkara Bitaraplyk güni we Täze ýyl baýramy mynasybetli, Türkmenistanyň Telekommunikasiýalar we informatika instituty talyp ýaşlaryň arasynda Açyk breýn-ring bäsleşigini geçirdi. Bu çäre 8-nji dekabrda “Hemişelik Bitaraplyk – baky bagtyýarlyk” şygary astynda guraldy.
Bäsleşige ýurdumyzyň 15 ýokary okuw mekdebinden toparlar gatnaşdy. Olaryň hatarynda Magtymguly adyndaky Türkmen döwlet uniwersiteti we Myrat Garryýew adyndaky Döwlet lukmançylyk uniwersiteti ýaly abraýly uniwersitetler hem bar. Her topar 6 agzadan ybarat bolup, oýun türkmen, rus we iňlis dillerinde geçirildi.
Türkmenistanyň Telekommunikasiýalar we informatika instituty bu ýylyň dowamynda bilim we tehnologiýa ugurlarynda halkara abraýyny artdyrýan birnäçe üstünlikli çäreleri geçirip, Täze ýyla täze maksatlar bilen gadam basýar.
Sähragül Täşliýewa,
Türkmenistanyň Telekommunikasiýalar we
Informatika institutynyň 5-nji ýyl talyby.
Teswirler