Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň öňe sürýän döwlet başlangyçlary esasynda ýurdumyzyň saglygy goraýyş ulgamynda birnäçe üstünlikler gazanylýar. Garaşsyz, baky Bitarap Diýarymyzda ynsan saglygyna uly üns berilýär. “Il saglygy – ýurt baýlygy” jümlesine eýerýän Gahryman Arkadagly Serdarymyz ýurdumyzyň saglyk ulgamyny hemmetaraplaýyn göwnejaý kämilleşdirýär. Ata Watanymyzda halkyň saglygy hakynda uly alada edilip, keselleriň öňüni almakda, bar bolan keselleri bejeriş işlerini geçirmekde dünýä lukmançylygynyň iň öňdebaryjy usullaryndan peýdalanylýar. Halkymyz häzirki zaman lukmançylyk enjamlary we derman serişdeleri bilen üpjün edilýär.
Diýarymyzda işlenilip durmuşa ornaşdyrlan “Saglyk” döwlet maksatnamasynyň yzygiderli durmuşa geçirilmegi raýatlaryň saglygy barada ýokary derejede edilýän aladadyr. Watanymyzda sportuň, şeýle hem köpçülikleýin bedenterbiýäniň ösdürilmegi, ýaş nesliň arasynda sagdyn durmuş ýörelgeleriniň wagyz edilmegi oňyn lukmançylyk syýasatynyň dabaralanýandygynyň aýdyň subutnamasydyr.
Alym Gahryman Arkadagymyzyň pähim-paýhasyndan syzylyp çykan “Türkmenistanyň dermanlyk ösümlikleri” atly ensiklopediki kitabyň 16 sany jildiniň halkymyza peşgeş berilmegi, ýurdumyzda saglygy goraýyş ulgamynda zähmet çekýän hünärmenleriň alyp barýan işinde ýene-de bir ýeňillikleriň biridir. Bu kitabyň ähli jildinde ýurdumyzyň daglarynda, düz ýerlerinde, sähralarynda, deňiz we derýaýaka ýerlerinde bitýän ösümlikleriň dermanlyk häsiýetleri, olaryň himiki düzümi, dermanlyk serişdeleriniň taýýarlanyşy, halk lukmançylygynda ulanylyşy barada giňişleýin beýan edilýär.
Lukmançylyk okuw merkezlerinde ösüp gelýän ýaş bilermenlere döwrebap bilim we ylym öwredilýär. Saglygy goraýyş merkezleri döwrebap anyklaýyş, bejeriş enjamlary bilen üpjün edilendir.
“Pähim-paýhas ummany, Magtymguly Pyragy” ýylynda halkyň saglygy barada uly aladalar edýän, ýurdumyzyň saglygy goraýyş ulgamynda daşary döwletler bilen iňňän jebis hyzmatdaşlygy ýola goýýan türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun! Halkyň saglygy barada edýän atalyk aladalary, tutýan tutumly işleri rowaçlyklara beslensin!
Gülälek ÝEGENGELDIÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Gistologiýa, embriologiýa we sitologiýa kafedrasynyň müdiri, lukmançylyk ylymlarynyň kandidaty
Teswirler