2024-nji ýylyň 9-13-nji dekabry aralygynda Hytaý Halk Respublikasynda Aziýa Ösüş Bankynyň Merkezi Aziýada Sebitleýin Ykdysady Hyzmatdaşlyk (CAREC) maksatnamasy esasynda okuw sapary geçirilýär. Bu okuw sapary Merkezi Aziýa ýurtlarynyň orta hünär bilim edaralarynyň işgärleri üçin tejribe alyşmak maksady bilen guraldy. Türkmenistandan Aşgabat şäherindäki Syýahatçylyk orta hünär okuw mekdebiniň we Türkmenistanyň Telekommunikasiýalar we informatika institutynyň “Infokommunikasiýa” hünär-tehniki okuw mekdebiniň wekilleri gatnaşýarlar.
Saparyň dowamynda Hytaý Halk Respublikasynyň Guansi-Çžuan awtonom welaýatynda bilim bermegiň hili, ösüş depginleri, dolandyryş düzgüni, hukuk kadalaşdyryjy resminamalary we bilim edaralarynyň hyzmatdaşlygy baradaky çykyşlar geçirildi. Bu çykyşlarda Hytaýyň orta hünär bilim maksatnamalarynyň ösdürilişi, innowasion tehnologiýalaryň ornaşdyrylyşy, täze bilim binalarynyň gurulmagy hem-de Aziýa Ösüş Bankynyň maliýe goldawynyň ähmiýeti aýratyn bellenildi.
Okuw saparynyň bir bölegi hökmünde türkmen wekilleri Guansi hünär-tehniki mekdebiniň mümkinçilikleri bilen tanyşdylar. Bu ýerde robot tehnologiýalary, VR we AR tehnologiýalarynyň ulanylyşy, döwrebap önümçilik tejribehanalary bilen işlemek ýaly şertler görkezildi. Şeýle-de Guansi elektrotehniki-politehniki institutynyň çägindäki orta hünär mekdepleriniň elektroenergetika, ulag logistikasy we gaýtadan dikeldilýän energiýa ugurlarynda gazanan üstünlikleri barada giňişleýin çykyşlar edildi.
Saparyň soňky günlerinde türkmen wekilleriniň Luçžou şäherindäki demirýol hünär-tehniki okuw mekdebi, Luçžou şäheriniň politehniki uniwersitetiniň ýanyndaky orta hünär okuw mekdebi we Guilin şäherindäki Guilin syýahatçylyk uniwersitetiniň gazananlary bilen tanyşmagy meýilleşdirilýär.
Bu çäre türkmen bilim işgärleriniň hünär tejribesini ösdürmäge we bilim ulgamynda täze tehnologiýalaryň ornaşdyrylmagyna itergi berer diýip, maglumatda bellenilýär.
Teswirler