Ýakynda Türkmenistanyň Ylymlar akademiýasynyň Halkara ylmy-tehnologiýa parkynda «Innowasiýalar, täze tehnologiýalar we olary önümçilige ornaşdyrmagyň meseleleri» atly III türkmen-hytaý ylmy-innowasion forumy geçirildi. Türkmenistan bilen Hytaý Halk Respublikasynyň arasynda ylmy-tehniki hyzmatdaşlygy işjeňleşdirmek babatda gazanylan ylalaşygy ýerine ýetirmek, ýurdumyzyň ykdysadyýetiniň pudaklarynda öňdebaryjy innowasion çözgütleri durmuşa geçirmek, milli innowasiýa ulgamyny ösdürmegiň aýratynlyklarynyň meselelerini ara alyp maslahatlaşmak bu çäräniň esasy maksadydyr. Bu möhüm çärä dostlukly ýurduň we biziň ýurdumyzyň ylmy-barlag merkezleriniň ýolbaşçylaryndan, ylmy işgärlerinden, ýokary okuw mekdepleriniň professor-mugallymlaryndan ybarat wekiliýet gatnaşdylar.
Türkmen-hytaý ylmy-innowasion forumynyň çäklerinde innowasion tehnologiýalaryň sergisi guraldy we iki ýurduň ylmy toparlarynyň wekilleriniň arasynda özara hyzmatdaşlygyň täze ugurlaryny ösdürmek boýunça pikir alyşmalar geçirildi. Gurnalan sergi köp sanly daşary ýurtly myhmanlara ylym-bilim ulgamynyň hemmetaraplaýyn kämilleşdirilmegine, döwletiň we jemgyýetiň durmuşynyň ähli ugurlaryna innowasiýalaryň, öňdebaryjy tehnologiýalaryň işjeň ornaşdyrylmagyna aýratyn üns berýän ata Watanymyzyň ösüş derejesi bilen ýakyndan tanyşmaga uly mümkinçilik döretdi.
Hormatly Arkadagly Gahryman Serdarymyz: «Biz ösüşiň innowasion ýoluny üpjün edýän senagat öwrülişiginiň täze tapgyrynda halkara ähmiýetli maksatnamalary, iri taslamalary durmuşa geçirmek bilen, milli ykdysadyýetimiziň kuwwatyny berkidýäris, halkymyzyň ýaşaýyş-durmuş derejesini yzygiderli ýokarlandyrýarys» diýip, foruma gatnaşyjylara iberen gutlagynda belleýär. Çünki Arkadagly Gahryman Serdarymyz ýurdumyzyň ykdysady, medeni, innowasion kuwwatynyň, ählumumy ösüşiň üpjün edilmegine uly üns berýär. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyna», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna» laýyklykda, diýarymyzda ylym-bilim ulgamynyň kämilleşdirilmegi doly üpjün edilýär. Ylmyň gazananlarynyň bäsdeşlige ukyplylygyny gazanmak, ylmy-barlag işlerini toplumlaýyn esasda ösdürmek, kiçi we orta telekeçiligiň innowasion taslamalara işjeň gatnaşmagyny gazanmak, innowasion önümleriň önümçiligini guramak maksady bilen netijeli işler ýola goýulýar. Iň kämil maglumat tehnologiýalaryna esaslanýan uly taslamanyň durmuşa geçirilmegi, ýagny sebitde we ýurtda ilkinji “akylly” şäher bolan Arkadag şäheriniň gurulmagy yzygiderli durmuşa geçirilýän özgertmeleriň aýdyň nyşany bolup durýar.
Forumyň çäklerinde türkmen we hytaý alymlarynyň arasynda özara gatnaşyklary ýola goýmak, ýurdumyzy ösdürmegiň maksatnamalarynyň ileri tutulýan ugurlarynyň çäklerinde geljekki bilelikdäki ylmy işler üçin hyzmatdaşlygyň ugurlaryny kesgitlemek barada gyzyklanma bildirilip pikir alşyldy, ylmy-tehnologik hyzmatdaşlygy pugtalandyrmak, ylmy işgärleri taýýarlamak, gazanylýan üstünlikleri baýlaşdyrmak ileri tutulýan ugurlary hökmünde kesgitlenildi. Döwrebap agrotehnologiýalar, gidromineral tebigy serişdeleri özleşdirmek, genetika, seçgiçilik ulgamynda gazanylan üstünlikler, innowasion tehnologiýalary senagat önümçiliklerine ornaşdyrmak, ekologik meseleleri çözmegiň netijeli usullary forumda üns çekilen möhüm meseleler boldy.
Firuza DOSÇANOWA,
Türkmen oba hojalyk institutynyň talyby.
Teswirler