2024-nji ýylyň 4-6-njy dekabry aralygynda Aşgabat şäherinde Türkiýäniň eksport harytlarynyň sergisi geçiriler. Mälim bolşy ýaly, doganlyk Türkiýe Respublikasynyň eksport harytlarynyň sergisini guramak asylly däbe öwrüldi. Üstümizdäki ýyl bu sergi 11-nji gezek geçirilýär.
Türkmenistanyň Söwda-senagat edarasynyň Sergiler toplumynda geçirilmegi göz öňünde tutulýan bu sergi Türkmenistanyň Söwda-senagat edarasy hem-de Türkiýäniň “Uluslararası Meridyen Fuarcılık” kompaniýasy tarapyndan gurnalar.
Köpugurly sergide türk haryt öndürijileri tarapyndan eksport edilýän ýokary hilli önümler – senagat pudaklary hem-de oba hojalygy üçin enjamlary we ätiýaçlyk şaýlary, gurluşyk serişdeleri, durmuş enjamlary we elektronika, ýuwujy serişdeler, dürli kosmetika önümleri, hojalyk harytlary, köke-süýji önümleri görkeziler.
Sergi türkmen we türk işewürleri üçin hyzmatdaşlyk etmek, hyzmatdaşlygyň geljegini ara alyp maslahatlaşmak we tejribe alyşmak üçin ajaýyp mümkinçilik döreder. Hususan-da, Türkmenistan bilen Türkiýäniň arasyndaky ykdysady gatnaşyklary pugtalandyrmakda, iki ýurduň arasynda söwda we maýa goýumlaryny giňeltmäge şert döreder.
Aýnur ASKARBEKOWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler