Berkarar döwletiň täze eýýamynyň Galkynyşy döwründe paýtagtymyz Aşgabatda Hormatly Prezidentimiziň başlyklyk etmeginde beýik türkmen şahyry Magtymguly Pyragynyň doglan gününi baýram etmegiň maksatnamasynyň çäklerinde «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumy geçirildi. Ýokary derejede geçen foruma Ermenistan Respublikasynyň, Eýran Yslam Respublikasynyň, Gazagystan Respublikasynyň, Gyrgyz Respublikasynyň, Mongologiýanyň, Pakistan Yslam Respublikasynyň, Russiýa Federasiýasynyň, Täjigistan Respublikasynyň, Özbegistan Respublikasynyň döwlet baştutanlary, Türkiýe Respublikasynyň Beýik Millet Mejlisiniň Başlygy, Russiýa Federasiýasynyň Tatarystan Respublikasynyň Baştutany, ÝUNESKO-nyň Baş konferensiýasynyň Başlygy, Halkara guramalaryň ýolbaşçylary, daşary ýurtlaryň hökümet agzalary, tanymal alymlar, medeniýet işgärleri we diplomatlar gatnaşdylar. Geçirilen halkara maslahatyň esasy maksady Magtymguly Pyragynyň döredijilik mirasyny giňden wagyz etmek, Gündogar halklarynyň dilleriniň we edebiýatlarynyň özara baglanyşygyny, beýik şahyryň umumyadamzat gymmatlyklarynyň genji-hazynasyna goşan goşandyny öwrenmekden ybaratdyr. Beýik akyldar şahyrymyz Magtymgulynyň doglan gününiň 300 ýyllyk ýubileýine bagyşlanýan bu möhüm wakanyň aýratyn many-mazmuny bar. Çünki tutuş dünýä edebiýatynyň ägirdi, görnükli akyldar Pyragy dünýä medeniýetiniň hazynasynda ebedi orun alan şahyrdyr.
Belli bolşy ýaly, dana Pyragynyň golýazmalar toplumy Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) «Dünýäniň hakydasy» maksatnamasyna girizildi. Şahyryň doglan gününiň 300 ýyllyk baýramy bu abraýly gurama bilen bilelikde bellenilip geçilýän şanly seneleriň sanawyna goşuldy. Türki medeniýetiň halkara guramasy (TÜRKSOÝ) 2024-nji ýyly «Türki dünýäniň beýik şahyry we akyldary Magtymguly Pyragy ýyly» diýip yglan etdi. Bularyň ählisi türkmen halkynyň beýik söz ussadyna bolan belent sarpasyny äşgär edýär. Paýtagtymyzyň gözel künjeginde Magtymguly Pyragynyň ajaýyp heýkeliniň we medeni-seýilgäh toplumynyň gurulmagy-da Milli Liderimiz Gahryman Arkadagymyzyň parasatly başlangyçlary bilen berk bagly. Magtymgulynyň şygryýeti watançylyk senasy bolup, onuň ajaýyp goşgulary ýaş nesillerde watansöýüjiligi, ýokary ahlaklylygy terbiýelemäge, ýaşlaryň ylymly-bilimli, kämil hünärli adamlar bolup ýetişmegine ýardam edýär.
Firuza DOSÇANOWA,
Türkmen oba hojalyk institutynyň talyby.
Teswirler