Hormatly Prezidentimiziň oba hojalyk pudagyny ösdürmek baradaky taýsyz tagallalarynyň, daýhanlar üçin döredýän oňaýly şertleriniň netijesinde, «Pähim-paýhas ummany Magtymguly Pyragy» ýylynda bugdaý meýdanlarynda bereketli hasyl kemala getirilýär. Şonuň bilen birlikde, ony öz wagtynda hem-de ýitgisiz ýygnamak üçin taýýarlyk işleri guramaçylykly alnyp barylýar.
Häzirki önümçilik birleşiginde galla orujy kombaýnlary öňde duran jogapkärli möwsüme taýýarlamak işlerine irgözinden girişildi. Önümçilik birleşiginiň ussahanalarynda «CLAAS» we «John Deere» kysymly galla orujy kombaýnlar doly gözden geçirilip, taýýarlyk hataryna çykarylyp goýuldy we her bir kombaýnda ýangyn howpsuzlygynyň talaplaryny berjaý etmek babatda öňüni alyş çäreleri geçirildi.
Şonuň ýaly-da, önümçilik kärhanasynda bugdaý oragy döwründe ýangyn-tehniki howpsuzlygynyň, ýol hereketiniň düzgünlerini pugta berjaý etmek boýunça hem degişli çäreler amala aşyrylýar. Bu barada kombaýnçylaryň, sürüjileriň, ýangyn-tehniki düzgünleriň berjaý edilmegine jogapkär adamlaryň arasynda gürrüňdeşlikler, maslahatlar guralýar. Galla oragy möwsümine taýýarlyk işleriniň talabalaýyk ýola goýulmagy onuň üstünlikli geçirilmegine mümkinçilik berer.
Ýurdumyzyň zähmetsöýer kärendeçileri asuda Watanymyzyň goýnunda halal zähmet çekmek üçin ähli zerur şertleriň döredilýändigine hoşal bolup, Gahryman Arkadagymyzyň, hormatly Prezidentimiziň janlarynyň sag, ömürleriniň uzak bolmagyny arzuwlaýarlar.
Agaýusup SAHATOW,
Türkmen oba hojalyk institutynyň talyby.
Teswirler