«Türkmenistan» awiakompaniýasy» açyk görnüşli paýdarlar jemgyýetiniň wekilleri 27 — 29-njy fewral aralygynda Malaýziýa ýarymadasynyň demirgazyk böleginde ýerleşýän hem-de arhipelagyň 99 adasynyň içinde iň uly ada bolan Langkawi adasynda konferensiýalaryň ilkinji sapar geçirilýän ýeri bolan Langkawi Halkara konferensiýalar merkezinde geçirilýän «Routes Asia 2024» forumyna gatnaşdy.
Aziýa-Ýuwaş ummany sebitine bagyşlanan, ýollary ösdürmek boýunça ýeke-täk çäre bolmak bilen bu forum awiakompaniýalara, howa menzillerine, syýahatçylyk kompaniýalaryna we awiasiýada gyzyklanma bildirýän taraplara duşuşyklar, öňdebaryjy tejribäni alşyp-berişmek hem-de ulgamlaýyn strategiýalary işläp düzmek, Aziýa-Ýuwaş ummany sebitindäki awiagatnawlaryň geljekki ösüşini üpjün etmek babatda tagallalary birikdirmek üçin meýdançany teklip edýär.
Türkmenistanyň howa ulgamy çygrynda daşary ykdysady aragatnaşyklary dürli ýurtlar bilen 50-den gowrak halkara ylalaşyklarynyň we konwensiýalarynyň esasynda amala aşyrylýar. Türkmenistan Raýat awiasiýasynyň halkara guramasynyň (IKAO), Awiasiýa we howa giňişligini ulanmak boýunça geňeşiň we Halkara awiasiýa komitetiniň (HAK) agzasy bolup durýar.
Ýeri gelende belläp geçsek, «Türkmenistan» awiakompaniýasy» açyk görnüşli paýdarlar jemgyýetiniň «Routes Asia 2024» forumyna gatnaşmagy Türkmenistanyň bu çygyrda Aziýa-Ýuwaş ummany sebitindäki hyzmatdaşlyk gatnaşyklaryny ösdürmäge we berkitmäge ýardam etmek üçin gönükdirilendir.
Aýjeren ÖDÄÝEWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler