«Blue Sky» studiýasy tarapyndan döredilen «Buz eýýamy» multfilmi gysga wagtda körpeleriň köňül küýsegine öwrüldi. Gülküli wakalary özünde jemleýän bu multfilm 2002-nji ýylyň mart aýynyň 15-ine ilkinji gezek ýaýlyma berilýär. Dowamlylygy 81 minuda barabar bolan bu multfilm ilki iňlis dilinde görkezilýär. Wagtyň geçmegi bilen «Buz eýýamy» multfilmi dürli dillere terjime edilýär. Onuň ilkinji bölümi kino synçylaryň öwgüsine mynasyp bolýar. Bu bolsa, režissýorlarda multfilmiň nobatdaky bölümlerini döretmäge uly hyjuw berýär.
«Buz eýýamy» multfilmi kino äleminiň iň abraýly sylaglarynyň biri bolan 75-nji Oskar baýragyna mynasyp bolýar. Mundan başga-da, multfilme birnäçe abraýly baýraklar gowşurylýar. «Buz eýýamy» multfilminiň ilkinji bölümi körpeler tarapyndan gyzgyn garşylanýar. Multfilm 5 bölümden ybaratdyr. Animasiýa döredijileri multfilmiň 6-njy bölümini 2022-nji ýylda körpelere ýetirmegi maksat edinýärler.
«Buz eýýamy» çagalara agzybirligi, jebisligi, belent adamkärçiligi ündeýär. Onda, esasan-da, wepaly dostluga aýratyn üns berilýär. Multfilmiň gahrymanlary dostlaryna wepaly bolup, birek-biregi goldaýarlar. Olar şeýlelikde, maksatlaryna ýetýärler, dostlary bilen wagtlaryny şadyýan geçirýärler. Adyndan mälim bolşy ýaly, «Buz eýýamy» multfilmi, esasan hem, gyş pasly bilen bagly wakalary, buzly ýerleri özünde jemleýär.
Bir zady aýratyn bellemeli, multfilmiň gyzykly çykmagynyň esasynda näme durýar?! Aslyýetine garanyňda, bu multfilmiň 3 gahrymany durmuşda hiç wagt hem bile gabat gelmeýär. Olaryň häsiýetleriniň biri-birine gabatlaşdyrylmagy, onuň mazmun taýdan gyzykly bolup, özüne çekijiligini ýokarlandyrýar.
Aýgözel NUROWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler