Berkarar döwletiň täze eýýamynyň Galkynyşy döwründe Hormatly Prezidentimiziň beýik başlangyçlary netijesinde oba hojalygynda amala aşyrylýan belent özgertmeler köňüllerde çäksiz buýsanjy goşalandyrýar. Çünki ýurdumyzyň obasenagat toplumynyň pudaklaýyn düzümleri tehniki taýdan enjamlaşdyrylyp döwrebaplaşdyrylýar. Toplumyň çäginde täze özleşdirilýän ekerançylyk maksatly ýerler üçin suw hojalyk desgalary yzygiderli gurulýar, ýerli toprak-howa şertlerine laýyk gelýän ýokary öndürijilikli tehnikalar yzygiderli satyn alynýar. Netijede, toplumy inženerçilik-tehniki taýdan üpjün etmek meseleleri täzeçil usulda çözülýär, ekerançylyk meýdanlarynyň suwaryş ulgamynyň kämilleşdirilmegine, tohumçylygyň we bu ugra degişli ylmy barlaglaryň ösdürilmegine köp mukdarda maliýe serişdeleri goýberilýär. Oba hojalyk ulgamyny sanlylaşdyrmak, ýerleri işläp taýýarlamagyň täzeçil usullaryny, öňdebaryjy agrotehnologiýalary ornaşdyrmak, daýhan birleşikleriniň, daýhan hojalyklarynyň we beýleki önüm öndürijileriň girdejilerini ýokarlandyrmak boýunça anyk çäreler durmuşa geçirilýär. Agrosenagat toplumyna sanly ulgamyny hem-de bazar gatnaşyklaryny işjeň ornaşdyrmak, pudakda hususyýetçileriň eýeleýän ornuny yzygiderli artdyrmak hem hemişe üns merkezinde saklanýar. Munuň özi her bir oba hojalyk möwsüminiň gyzgalaňly, üstünlikli ýagdaýda alnyp barylmagyna, bereketli hasylyň ýetişdirilmegine mümkinçilik döredýär. Häzirki wagtda gyzgalaňly ýagdaýda alnyp barylýan şaly oragynyň bellenilen möhletlerde geçirilmegine uly üns berilýär. Eziz Diýarymyzda möhüm bolan bu oba hojalyk möwsüminde şaly orujy tehnikalary abatlamak maksady bilen göçme ussahanalar, zerur enjamlar we ýangyç daşamaga niýetlenen awtoulaglar bilen üpjün edildi. Şaly ösdürip ýetişdirmekde oba hojalyk ähmiýetli ýer gaznasyndan ýer böleklerini alan hususy önüm öndürijiler hem ýurdumyzyň obasenagat toplumynyň kuwwatlyklaryny artdyrmakda ýyl-ýyldan işjeňlik görkezýändikleri guwandyryjydyr. Daşary ýurtlardan getirilýän harytlaryň ornuny tutýan önümçilikleri we ýurdumyzyň eksport kuwwatlyklaryny artdyrmak boýunça döwlet maksatnamalarynyň amala aşyrylmagyny üpjün edýän şalyçylyk ugry obasenagat toplumynyň esasy pudaklarynyň biri bolup çykyş edýär. Bu pudakda giň möçberli özgertmeleriň durmuşa geçirilmegi esasynda obasenagat toplumynyň netijeliligi ýokarlanýar, azyk bolçulygy üpjün edilýär. Biz hem, edermen daýhanlarymyza harmanyňyza bereket, ýylyňyz rysgally bolsun diýýäris!
Firuza DOSÇANOWA,
Türkmen oba hojalyk institutynyň II ýyl talyby.
Teswirler