Ata-babalarymyzyň paýhasy siňen pähimler, nakyllar ösýän jemgyýetimizde ýokary ahlakly, watansöýüji nesilleri kemala getirmekde ygtybarly serişdedir. Halkymyzyň asyrlara uzaýan baý taryhy bar. Edil şonuň ýaly hem halkymyz çeper söz sungatyna, ylym-bilime, ýaş nesliň tälim-terbiýesine aýratyn mukaddeslik hökmünde garaýar.
Türkmen halky öz taryhy ösüşinde örän köp nakyllardyr atalar sözüni we durnukly söz düzümlerini döredipdir. Nakyllar temasy boýunça köpdürli bolup, durmuş hakykatyny öz içine alýan edebi gymmatlykdyr. Şoňa görä-de islendik nakyly dile getirseň, onuň dürli ýagdaýlarda, dürli sebäplere görä ýüze çykyşy bilen baglylykda, dürli mazmunda ulanyp bolýandygyna göz ýetirmek mümkin.
Nakyllar esasan öwüt-nesihat häsiýetli bolup, olar nesil terbiýesinde giňden ulanylypdyr. Bilşimiz ýaly, nakyllar durmuş tejribesiniň we çeper sözüň üsti bilen döredilen gymmatlyklardyr. Onuň täsirliligi hem hut şonuň üçindir. Olar paýhas eleginde elenip, biziň şu günki günlerimize gelip ýetipdir.
Geçmişde pederlerimiziň döreden nakyllary halk döredijiliginiň gymmatly görnüşi bolup, olar häzirki wagtda hem ähmiýetini ýitirmeýär. Bilim işgärleri, ene-atalar hem bu paýhasly sözleri nesil terbiýesinde işjeň ulanýarlar. Şonuň üçin-de milli terbiýäniň ähmiýeti, gymmatlygy has-da ýokary göterilýär.
Jennet AGALYKOWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler