Berkarar döwletiň täze eýýamynyň Galkynyşy döwrüniň belent bady bilen rowaçlanýan ýurdumyzda hormatly Prezidentimiziň parasatly baştutanlygynda amala aşyrylýan giň möçberli maksatnamalaryň, möhüm ähmiýetli iri taslamalaryň durmuşa geçirilmegine gönükdirilen işler üstünliklere beslenýär. Çünki ata Watanymyzyň okgunly ösüşini üpjün etmek, halkymyzyň abadançylyk, durmuş derejesini yzygiderli ýokarlandyrmak ýola goýulýan işleriň baş maksady bolup durýar.
Oba milli maksatnamasyna laýyklykda, açylyp ulanmaga berilmegi meýilleşdirilen dürli maksatly binalaryňdyr desgalaryň gurluşyk işleriniň ýokary hilli ýerine ýetirilmegi gazanylýar. Oba hojalyk ulgamynyň maddy-enjamlaýyn binýadyny pugtalandyrmak, oba hojalyk ekinlerinden bol hasyl almak ugrunda yhlas etmek, pudaga kämil enjamlary ornaşdyrmak we toplumyň işini mundan beýläk-de kämilleşdirmek, sanly ýer kadastrynyň döredilmegine ýardam bermek, şorlaşan oba hojalyk meýdanlarynda tebigy serişdeleri dolandyrmak boýunça ileri tutulýan meseleler üstünlikli çözülýär. Azyk howpsuzlygyny üpjün etmek, howanyň üýtgemeginiň öňüni almak, daşky gurşawy goramak babatda Durnukly ösüş maksatlarynda bellenen möhüm wezipeleri çözmek halkara hyzmatdaşlygyň netijeliliginiň ýokarlandyrylmagyny hem talap edýär. Şunda sebit we ählumumy hyzmatdaşlygy ösdürmek uly ähmiýete eýe bolup durýar.
Milli ykdysadyýetiň beýleki pudaklaryna sanly ulgamyň we öňdebaryjy tehnologiýalaryň ornaşdyrylyşy, maddy-enjamlaýyn binýadyny döwrebaplaşdyrmak, ýurdumyzda öndürilýän önümleriň daşary ýurtlara iberilýän möçberini we ugurlaryny artdyrmak maksady bilen anyk çäreler görülýär. Munuň özi milli ykdysadyýetimiziň innowasion kuwwatynyň artdyrylmagyna, onuň diwersifikasiýalaşdyrylmagyna, häzirki zaman düzümleriniň döredilmegine, halkyň maddy hal-ýagdaýynyň, durmuş derejesiniň mundan beýläk-de ýokarlandyrylmagyna esas döredýär.
Daşky gurşawy goramak ulgamynda alnyp barylýan giň gerimli işlere, ýurdumyzyň obadyr şäherleriniň ekologik abadançylygyny gorap saklamak we ony bagy-bossanlyga öwürmek meselesine aýratyn üns berilýär. Şunuň bilen birlikde, söwda we hyzmatlar edaralarynyň bökdençsiz işledilmegini üpjün etmek, sanly ulgamyň mümkinçiliklerini netijeli ulanmak boýunça wezipeler guramaçylyk ýagdaýynda ýerine ýetirilýär.
Umuman, eziz Diýarymyzda alnyp barylýan şeýle asylly işler Arkadag Serdarly bagtyýar ýaşlar ýylynda hormatly Prezidentimiz Arkadagly Gahryman Serdarymyzyň baştutanlygynda ýurdumyzda raýatlar baradaky edilýän aladanyň döwlet syýasatynyň möhüm ugrudygynyň aýdyň subutnamasydyr.
Firuza DOSÇANOWA,
Türkmen oba hojalyk institutynyň II ýyl talyby.
Teswirler