Berkarar döwletimiziň täze eýýamynyň Galkynyşy döwründe Hormatly Prezidentimiziň tagallasy bilen bilim syýasaty işjeň ösdürilýär. Ýaşlaryň okap bilim almagy üçin täze ýokary okuw jaýlary, orta mekdepler, çagalar baglary, mekepden daşary okuw merkezleri hereket edýär. Milli bilim ulgamynyň ähli taraplaýyn ösdürilmegi hem-de onuň maddy-enjamlaýyn binýadynyň berkidilmegi, bu ulgamyň hil taýdan täze derejä çykarylmagy babatda Hormatly Prezidentimiziň amala aşyrýan beýik işleri bu gün özüniň oňyn netijelerini berýär.
Bilimler we talyp ýaşlar gününde paýtagtymyzda we ýurdumyzyň welaýatlarynda birbada ýokary okuw mekdepleriniň birnäçesiniň — Mary şäherinde Türkmenistanyň Döwlet energetika institutynyň çäginde täze okuw binasynyň, paýtagtymyzda Türkmen döwlet binagärlik-gurluşyk institutynyň, Seýitnazar Seýdi adyndaky Türkmen döwlet mugallymçylyk institutynyň täze binalar toplumlarynyň, Türkmenistanyň Prezidentiniň ýanyndaky Döwlet gullugy akademiýasynyň binalar toplumynyň ulanylmaga berilmegi ähli türkmen halkymyzy we bilim işgärleriniň şatlygyna şatlyk goşdy. Arkadag şäherinde gurulyp ulanylmaga berilen Aba Annaýew adyndaky Halkara atçylyk akademiýasynyň, Saçly Dursunowa adyndaky lukmançylyk orta hünär okuw mekdebiniň, Berdimuhamet Annaýew adyndaky mugallymçylyk orta hünär okuw mekdebiniň we beýleki binalaryň işe girizilmegi ylym-bilim pudagynyň mundan beýläk hem ösmegine, kämilleşmegine mümkinçilik döreder.
Bu gurulan binalaryň ählisi dünýäniň iň ösen tehnologiýalary bilen enjamlaşdyrylan bolup ýaşlaryň bilim almagyna we täze tehnologiýalardan baş çykarmagyna amatly şert döretýär. Bu bolsa öz gezeginde ýaşlaryň her pudak boýunça ussat, täze tehnologiýalardan baş çykarýan hünärmenler bolup ýetişmegine getirer
Ýurdumyzda bilim ulgamynyň ösmegi üçin döredilen şeýle mümkinçilikler alnyp barylýan bilim syýasatynyň dogry ýola goýulýandygyna şaýatlyk edýär.
Merjen ŞÜKÜROWA,
Türkmenistanyň Prezidentiniň ýanyndaky
Döwlet gullugy akademiýasynyň talyby.
Teswirler