Maşgalanyň, bilim ojaklarynyň, saglygyň-sagdynlygyň, jemgyýetçilik guramalarynyň sazlaşykly gatnaşyklarynyň ýaşaýyş-durmuşymyzda, ýurdumyzyň ösüş-özgerişlerinde, nesil terbiýesinde uly ähmiýetiniň bardygy hakykat. Maşgaladan gözbaş alýan nesil terbiýesi çagalar edaralarynda, orta mekdeplerde berilýän bilim-terbiýe bilen sazlaşyp, ösýär, kämilleşýär. Ýaş nesliň ylymly-bilimli, kärli-hünärli bolmagy, watansöýüjiligiň, ynsanperwerligiň, zähmetsöýerligiň belent ruhunda terbiýelenmegi, bedenterbiýe, sport, döredijilik bilen meşgullanmagy, Diýarymyzyň jemgyýetçilik durmuşyna işjeň gatnaşmagy olaryň durmuşda öz mynasyp ornuny tapyp, işlemegine, döretmegine, milli ykdysadyýetimiziň bedew batly ösüşlerine goşant goşmagyna ýol açýar.
Berkarar döwletiň täze eýýamynyň Galkynyşy döwründe Arkadagly Serdarymyzyň tagallalary netijesinde ösüp gelýän nesle bilim-terbiýe bermekde giň möçberli işler durmuşa geçirilýär. Mekdepleriň maddy-enjamlaýyn binýady döwrebaplaşdyrylyp, bilim işgärleriniň iş we durmuş şertleriniň ýokarlanmagyna uly üns berilýär. Ýaş nesil biziň geljegimiz bolany üçin ösüp gelýän nesle durnukly bilim we mynasyp terbiýe bermek örän jogapkärli wezipe. Çünki, okuwçylara şu günki berilýän bilim-terbiýe geljegimiziň abadan bolmagy bilen aýrylmaz baglydyr.
Milli Liderimiziň paýhasa ýugrulan eserlerinde perzent terbiýesiniň ähmiýeti barada öwran-öwran nygtalýar, durmuş hakykatlary, täsirli wakalar bilen beýan edilýär. Maşgalada we mekdepde, jemgyýetçilik gurşawynda perzentlere, nesillere berilýän terbiýäniň, görüm-göreldäniň olaryň geljekki ykbalyna düýpli täsir edýändigi aýdyň suratlandyrylýar. Edep-terbiýeli, maksadaokgunly, watansöýüji, çuňňur bilimli we giň dünýägaraýyşly ýaşlary ýetişdirmekde Gahryman Arkadagymyzyň eserleri bahasyna ýetip bolmajak gollanmadyr.
Arzuw BATYROWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler