Berkarar döwletiň täze eýýamynyň Galkynyşy döwründe Milli Liderimiz Gahryman Arkadagymyzyň nusgalyk ýoluny mynasyp dowam etdirýän hormatly Prezidentimiziň parasatly ýolbaşçylygynda Türkmenistan ýurdumyzda milli ykdysadyýetimiziň ähli ugurlary bedew bady bilen öňe ilerleýär. Günsaýyn ýokary depginler bilen ösýän pudaklary sanlylaşdyrmak babatda netijeli işler ýola goýulýar. Sanly ulgamyň giň mümkinçiliklerinden netijeli peýdalanylýar hem-de ösen innowasion ykdysadyýet kemala getirilýär. Eziz Diýarymyzda sanly ykdysadyýeti ösdürmek boýunça maksatnamalaýyn işler alnyp barylmak bilen, eziz Watanymyzyň ykdysady kuwwaty artdyrylýar.
Ykdysadyýetiň pudaklarynyň sanlylaşdyrylmagyna, maglumat-aragatnaşyk tehnologiýalarynyň we ilata edilýän sanly hyzmatlaryň kämilleşdirilmegine, “akylly” innowasiýalaryň ornaşdyrylmagyna möhüm orun berilýär. Ýurdumyzda Arkadagly Gahryman Serdarymyzyň sanly ykdysadyýeti ösdürmek babatda alyp barýan döwlet syýasatynda hem bu ugurdaky möhüm wezipeleriň çözülmegine gönükdirilen başlangyçlar bar. Bu ugurda sanly resminamalar dolanyşygyny ýola goýmak, elektron hökümeti döretmek netijesinde döwlet dolandyryşy hem kämilleşdirilýär. Şeýle-de Diýarymyzyň bilim ojaklarynda, orta, orta hünär, ýokary okuw mekdeplerinde ýaş nesli sanly ulgamyň gazananlary bilen habarly etmek, okuw otaglaryny innowasion enjamlar bilen üpjün etmek, geçilýän okuw sapaklaryny ýokary derejede guramak işleri ýola goýulýar. Munuň özi bolsa ýokary hilli tehnologiýalara esaslanýan önümçilikde zähmet çekmäge ukyply, giň dünýägaraýyşly ýaş hünärmenleriň kemala gelmegine, kämil tehnologiýalardan baş çykarýan ýokary derejeli hünärmenleriň taýýarlanylmagyna ýardam edýär. Sanlylaşdyrmak işleri häzirki wagtda hususy ulgama hem işjeň ornaşýar, täze önümçilikler ýola goýulýar, ýurdumyzyň dünýä hojalygyndaky orny has-da pugtalanýar, netijede öndürilýän harytlaryň hili ýokarlanýar we hyzmatlar ulgamy hem kämilleşýär. Ýurdumyzda hereket edýän «Türkmenistanda sanly bilim ulgamyny ösdürmegiň Konsepsiýasy» sanly ulgamy ösdürmeklik bilen halk hojalygynyň ähli ugurlarynyň hünärmenler we innowasiýalar bilen üpjünçiligine üns berilýär. Umuman, sanly ulgamyň ýokary derejede ösdürilmegi Türkmenistan Watanymyzda mundan beýläk-de durnukly ykdysady ösüşi gazanmaga we mähriban halkymyzyň ýaşaýyş-durmuş derejesini barha ýokarlandyrmaga mümkinçilik berer. Şeýle bagtyýar zamanada sanly ykdysadyýeti ösdürmek we ony barha kämilleşdirmek arkaly ata Watanymyzy gülledip ösdürýän Milli Liderimiz Gahryman Arkadagymyza, Arkadagly Gahryman Serdarymyza çäksiz alkyş aýdýarys!
Aýjemal AŞYRGULYÝEWA,
Türkmen oba hojalyk institutynyň Maglumat ulgamlary we tehnologiýalary taýýarlyk ugrunyň III ýyl talyby.
Teswirler