Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzyň ähli ugurlar boýunça uly ösüşlere beslenmegi, belent sepgitlere eýe bolmagy ýola goýulýan ykdysady strategiýanyň aýdyň netijesidir. Milli ykdysadyýetiň her bir pudagynda netijeli işler gazanylyp, eziz Diýarymyzyň ähli sebitlerinde, ähli ulgamlarynda oňyn görkezijilere eýe bolunýar. Türkmenistanda durmuş-ykdysady ösüşi nazarlaýan özgertmeleriň netijesinde halkymyzyň ýaşaýyş derejesini ýokarlandyrmaga gönükdirilen giň gerimli taslamalar amala aşyrylýar.
Önümçilik maksatly desgalar, amatly ýaşaýyş jaýlary, çagalar baglary, mekdepler, täze hassahanalar, saglyk merkezleri, durmuş üpjünçiliginiň dürli düzümlerine degişli desgalar gurlup ulanylmaga berilýär. Dokma senagaty, nebitgaz, ýangyç-energetika, maşyngurluşygy, elektron senagaty, gurluşyk pudagy, derman senagaty ýaly pudaklaryň döwrebap binalary gurlup ulanylmaga berildi. Ýurdumyzda öndürilýän azyk önümleriniň, azyk harytlarynyň görnüşlerini artdyrmaga we möçberlerini ýokarlandyrmaga giň ýol açylýar, netijede diýarymyzda azyk bolçulygy berkarar bolýar. Döwrebap, ýokary tehnologik kärhanalaryň işe girizilmeginiň netijesinde öndürilýän önümleriň hili hem barha kämilleşýär, importyň ornuny tutýan önümleriň önümçiligi ösdürilýär.
Ykdysadyýetimizi ösdürmekde innowasion tehnologiýalardan netijeli peýdalanylýar. Şeýle-de daşary ýurt maýa goýumlaryny işjeň çekmäge we olary netijeli özleşdirmäge, halk hojalygynda depginli ösüşiň mundan beýläk-de dowam etmegine, elektron resminama dolanyşygyna we sanly ykdysadyýete geçmäge gönükdirilen netijeli çäreler durmuşa geçirilýär, ykdysadyýetiň döwlete dahylsyz bölegi, telekeçilik barha netijeli ýagdaýda ösdürilýär, dünýä bazarynda bäsdeşlige ukyply harytlaryň önümçiligi önümiň özüne düşýän gymmatyny peseltmäge mümkinçilik berýär.
Ýurdumyz dünýäniň ençeme döwleti bilen özara bähbitli söwda-ykdysady gatnaşyklary işjeň ýagdaýda alyp barýar. Halkara ülňülerine laýyk gelýän döwrebap ulag düzümleriň döredilmegi, durkunyň täzelenilmegi geljekki ykdysady ösüşleriň binýadyny has hem berkidýär. Hususy eýeçiligiň ösdürilmegi boýunça işler mynasyp dowam etdirilýär, kiçi we orta telekeçilik goldanylýar. Hususy pudagy goldamak boýunça çäreleriň amala aşyrylmagy, salgyt ýeňillikleriniň döredilmegi ykdysadyýetiň döwlete dahylsyz böleginiň täze belentliklere ýetmegini şertlendirýär.
Jeren SERDAROWA,
Türkmen oba hojalyk institutynyň
Oba hojalygynyň ykdysadyýeti we
dolandyryşy taýýarlyk
ugrunyň I ýyl talyby.
Teswirler