Arkadag Serdarly bagtyýar ýaşlar ýylynyň täze okuw ýylynyň ilkinji gününde — Bilimler we talyp ýaşlar gününde hormatly Prezidentimiziň ak patasy bilen, paýtagtymyzyň görnükli ýerleriniň birinde Türkmen döwlet binagärlik-gurluşyk institutynyň binalar toplumynyň düýbüniň tutulmagy uly dabara beslendi.
Häzirki zaman ylmy we taslama bilim edarasy bolan bu bilim ojagy Türkmenistanyň Prezidentiniň Permanyna laýyklykda, 2012-nji ýylyň 25-nji maýynda döredildi. Häzirki wagtda institutda 7 fakultet, 126 kafedra hereket edýär, 3 müňden gowrak talyp bilim alýar, her ýyl 600-den gowrak hünärmen taýýarlanylýar. Talyp ýaşlar Aşgabadyň keşbiniň özgermegine, ýurdumyzda alnyp barylýan gurluşyk meýilnamalaryna, döredijilik bäsleşiklerine döwrebap binagärlik taslamalary hem öz täze teklipleri bilen gatnaşýarlar. 2023-nji ýylyň mart aýynyň 11-ne Türkmenistanyň Ylymlar akademiýasynyň Tehnologiýalar merkezinde geçirilen «Berkarar döwletiň täze eýýamynyň Galkynyşy döwründe milli binagärligiň ösüşi» atly binagärlik-taslama döredijilik sergisi munuň aýdyň subutnamasyna öwrüldi. Köpetdagy etekläp oturan ajaýyp Arkadag şäheriniň ähli döwrebap aýratynlyklary, ýaşamak üçin amatlyklary özünde jemlemegi üçin dynuwsyz tagallalary edýän Gahryman Arkadagymyzyň hem Arkadagly Serdarymyzyň bu döwletli işlerde ýaşlara, şol sanda Türkmen döwlet binagärlik-gurluşyk institutymyzyň mugallymlarydyr talyplaryna ýokary ynam bildirmegi aýratyn bellärliklidir.
Döwrümizi şöhratlandyryp, türkmen ýaşlarynyň ylymly–bilimli, giň dünýägaraýyşly bolmagy barada alada edýän Gahryman Arkadagymyzyň, Arkadagly Serdarymyzyň janlary sag, belent başlary aman bolsun!
Yslam TYLLANUROW,
Türkmen döwlet binagärlik we
gurluşyk institutynyň Inžener-mehanika
fakultetiniň dekany.
Teswirler