Iýunyň bosagadan ätlemegi bilen Günüň ýiti şöhlesi öz hökmüni ýöredip ugrady. Bu bolsa tomsuň jöwzasyndan talabalaýyk goranmagy, şahsy we jemgyýetçilik arassaçylyk tertip-düzgünlerini doly hem-de dogry berjaý etmegi talap edýär. Eger siz aşakdaky maslahatlara eýerseňiz, bu möwsümde ýüze çykyp biläýjek hassalyklardan goranyp bilersiňiz.
Kiçi ýaşly çagalara howanyň aşa gyzan mahalynda daşary gezelenje çykmaklyk maslahat berilmeýär.
* * *
Gartaşan we dowamly keselleri bolan adamlar lukman gözegçiliginde bolmaly.
* * *
Irden sagat 9.00-a çenli we öýlän howanyň salkynlaşan mahalynda 18.00-dan soň möwsüme görä açyk reňkli, nah matadan tikilen eşikleri geýip, erkekler başgaply, zenanlar ýaglykly daşary çyksalar dogry bolar. Şonda saýawan götermek, ýanyňyz bilen arassa agyz suwuny almak maslahat berilýär. Günüň dowamynda 2-2,5 litre çenli arassa agyz suwuny içmeli.
* * *
Tomsuň yssy günlerinde daglara, açyk meýdanlara gezelençleri guramazlygy, açyk meýdanda işleýän adamlara möwsüme görä geýinmegi we başaçyk gezmezligi maslahat berýäris.
* * *
Tomus aýlarynda kabul edýän iýmitiňize-de ünsli bolmaly. Gök önümlere, miwelere, süýt we süýt önümlerine has köp üns bermeli. Ýagly we ajy tagamlardan daş durmaly. Kakadylan et we balyk önümlerini, şöhlatlary iýmitiňizden aýyrmaly. Tomus tagamlary gaýnadylan we buglanan görnüşde taýýarlanylsa, saglygyňyz üçin peýdaly bolar.
Türkmenistanyň Saglygy goraýyş we
derman senagaty ministrliginiň
Saglygy goraýşyň habarlar merkezi.
Teswirler