Hormatly Prezidentimiziň bilim ulgamynda durmuşa geçirýän özgertmelerinden ugur alyp, Türkmenistanyň Oguz han adyndaky Inžener-tehnologiýalar uniwersitetiniň garamagynda “Goşmaça we üznüksiz bilim”okuw merkezi öz işine başlady. Bu merkez Sizi tebigy we takyk ugurlary boýunça ýörite maksatnama esasynda alnyp barylýan hünär taýýarlygyna çagyrýar!
“Goşmaça we üznüksiz bilim” okuw merkezi şu aşakdaky ugurlary öz diňleýjilerine hödürleýär:
- Mugallymçylyk işi we pedagogik tehnologiýa;
- Sanly ykdysadyýet;
- Matematika;
- Fizika;
- Biologiýa;
- Himiýa;
- Iňlis dili;
- Ýapon dili;
- Kompýuter sowatlylygy;
- Programmirlemek;
- Robot tehnikasy;
- Kompýuterde inženerçilik grafikasy we animasiýasy;
- Kiberhowpsuzlyk.
“Goşmaça we üznüksiz bilim” okuw merkezinde Mugallymçylyk işi we pedagogik tehnologiýa hünär taýýarlygy boýunça okuwlar 18 hepde, Sanly ykdysadyýet hünär taýýarlygy boýunça okuwlar 2 aý dowam edýär. Ara we jemleýji synagyndan kanagatlanarly baha bilen geçmegi başaran diňleýjilere okuwlary üstünlikli tamamlandygy barada sertifikat gowşurylýar.
Fizika, matematika, himiýa, we biologiýa ugurlary boýunça taýýarlyk okuwlary jemi 4 derejeden we her derejäniň möhleti 8 hepdeden ybarat bolup, okuwlaryň dowamynda dersleriň orta mekdebiň meýilnamasyna laýyklykda ähli bölümleri çuňlaşdyrylyp öwrediler. Okuwlaryň netijesinde diňleýji saýlan ugrunyň ähli bölümleriniň nazarýetini çuňňur öwrenip, olarda gabat gelýän adaty we standart däl meseleleri çözmegi başarar.
Şeýle-de, okuw merkezi biologiýa, himiýa, fizika, we matematika ugurlary boýunça tizleşdirilen 2 aýlyk gysga möhletleýin okuwlary hem hödürleýär.
Iňlis dili boýunça okuwlar Begginer, Elementary, Pre-Intermediate, Intermediate derejelerinden ybarat bolup, okuw döwründe diňleýjä iňlisçe okamagy, ýazmagy, terjime etmegi we şolaryň netijesinde iňlis dilinde erkin gürlemegi öwrediler.
Ýapon dili boýunça okuwlar 2 derejeden (minnano nihongo I, II) ybarat bolup, ýapon diline düşünmegi, ýaponça gürlemegi, 500-den 1500-e çenli iýeroglifleri ýatdan bilmegi we dürs ýazmak endigi öwrediler.
Programmirlemek ugruna degişli Programmirlemegiň başlangyçlary C++, Python, Maglumatlaryň gurluşlary we algoritmleri, Web programmirlemegiň esaslary – Frond end, Web programmirlemegiň esaslary – Baсk end, Mobil gurluşlary programmirlemek – Flutter (I,II) okuwlary çuňlaşdyrylyp öwredilýär.
Robot tehnikasy ugry jemi 16 hepdeden ybarat bolup, 144 okuw sagatdan durýar. Hepdede 3 gün okadylyp, her sapak 3 okuw sagat dowam edýär. Okuw merkezine mekdep okuwçylary, talyplar we beýleki robot tehnika dersini öwrenmek bilen gyzyklanýan islendik raýatlar diňleýji hökmünde kabul edilýär.
Kompýuterde inženerçilik grafikasy we animasiýasy dersini öwretmegiň maksady mekdepleriň ýokary synplarynda okaýan okuwçylara we mekdebi tamamlan ýaşlara düýpli grafika boýunça bilim bermekden we olaryň grafika, dizaýn endiklerini kemala getirmekden we inženerçilik endiklerini ösdürmekden ybaratdyr.
Kompýuterde inženerçilik grafikasy we animasiýasy kursuny öwrenmek diňleýjilerde hyýaly pikirlenmäni we özbaşdak işlemek endiklerini kemala getirmäge, ünslüligi, erkliligi, tutanýerliligi ösdürmäge, zähmetsöýerligi terbiýelemäge, olaryň ylmy dünýägaraýyşlarynyň düýbüni tutmaga gönükdirilendir.
“Goşmaça we üznüksiz bilim” okuw merkezinde okatmagyň innowasion usullary (okuwlaryň oýunlar görnüşinde gurnalmagy, döredijilikli pikirlenmegi ösdürmäge gönükdirilmegi), halkara derejelerdäki bäsleşikleriň ýeňijisi bolan tejribeli mugallymlar tarapyndan okadylmagy, diňleýjileriň dünýägaraýşynyň we biliminiň giňeldilmegi, standart däl meseleleri çözmegi öwredilmegi bu merkeziň esasy aýratynlyklarydyr.
Teswirler
Gowy ediodirler mollumcylygy acyp
Okuw merkezi 2022-nji ýylyñ sentýabr aýynda açyldy we täze tapgyrlara ýazylmaklyk üznüksiz dowam etdirilýär. Men bu merkezde işleýänligime örän buýsanýaryn. Biz hemişe bilimini kämilleşdirmek isleýänlere garaşýarys!