Türkmenistanyň Garaşsyzlygynyň, hemişelik Bitaraplygynyň binýadyny mundan beýläk-de pugtalandyrmak, sebitde we dünýäde parahatçylygy we asudalygy üpjün etmäge mynasyp goşant goşmak şu günüň esasy wezipeleriniň biridir. Ata Watanymyzyň şan-şöhratyny artdyrmak, halkymyzyň medeni mirasyny, ruhy-ahlak ýörelgelerini nesilden-nesle geçirmek mukaddes borjumyzdyr.
Arkadag Serdarly bagtyýar ýaşlar ýylyny dabaralandyrmak, Gahryman Arkadagymyzyň, Arkadagly Serdarymyzyň dünýäde parahatçylygy, asudalygy has-da berkitmek babatda öňe sürýän başlangyçlaryny goldamak, mähriban Watanymyzdaky parahat we asuda durmuşymyzy, Berkarar döwletiň täze eýýamynyň Galkynyşy döwrüniň ajaýyp üstünliklerini beýan edýän dürli görnüşdäki edebi eserleri ýazmaga ýaşlary höweslendirmek maksady bilen, «Watan» gazetiniň redaksiýasy Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap geňeşi bilen bilelikde «Ýaşasyn parahat durmuş!» atly bäsleşigi yglan etdi.
Bäsleşigiň şertlerine laýyklykda, ýaş okyjylarymyz makalalaryny, oçerklerini, hekaýalaryny, goşgularyny (öň çap edilmedik we başga bäsleşiklere hödürlenilmedik) bäsleşige hödürläp biler. Bäsleşige hödürlenilýän işlerde eziz Watanymyzyň parahatçylygy, dünýäde parahat durmuşyň höküm sürmegi ugrunda öňe sürýän başlangyçlary öz beýanyny tapmalydyr.
Bäsleşige gatnaşyjylar döreden eserleriniň ýanyna özleri hakyndaky maglumaty (okaýan, işleýän we ýaşaýan ýeriniň salgysyny, iş, öý ýa-da el telefonyny) goşmalydyr.
Bäsleşigiň netijeleri 2023-nji ýylyň sentýabr aýynda jemlener we bäsleşigiň ýeňijilerine baýraklar gowşurylar.
Bäsleşige hödürlenýän eserleri «Bäsleşige» diýen ýazgy bilen «Watan» gazetiniň redaksiýasyna ibermeli.
Biziň salgymyz:
Aşgabat şäheri, Garaşsyzlyk şaýoly 100, Türkmenbaşynyň erkin döredijilik mekany.
Telefonlarymyz: 38-61-03; 38-61-05; 38-61-16; 38-61-17.
Gazetiň elektron salgysy: watan@sanly.tm
Teswirler