Hormatly Prezidentimiz Türkmenistanyň Magtymguly adyndaky Ýaşlar guramasynyň nobatdaky VIII gurultaýyna gatnaşyjylara we ýurdumyzyň ähli ýaşlaryna iberen gutlagynda şu günki türkmen ýaşlarynyň gujur-gaýratyna, ýiti zehinine, täsin ukyp-başarnygyna aýratyn ünsi çekip: «Ýaşlar mähriban halkymyzyň, eziz Watanymyzyň beýik geljegini gurujylardyr, jemgyýetimiziň işjeň bölegidir. Eziz Diýarymyzyň güýç-kuwwaty, abraý-mertebesi we aýdyň geljegi bolan ýaşlar biziň alyp barýan işlerimize, ýurdumyzyň ösüşlerine öz mynasyp goşantlaryny goşýarlar. Bu günki gün ylym-bilim, sport, medeniýet, sungat ugurlarynda dünýäde uly üstünlikleri gazanýan türkmen ýaşlarynyň döwletimiz tarapyndan özlerine bildirilýän belent ynamy ödeýändiklerine buýsanýarys» diýip belleýär. Arkadagly Serdarymyzyň türkmen ýaşlaryna bildirýän belent ynamy-da, olara bolan çäksiz beýik söýgüsi-de ýurdumyzda Gahryman Arkadagymyzyň esaslandyran ýaşlar syýasatynyň dowamat dowam bolup, barha rowaçlanýandygyny aýan edýär.
Türkmen halkynyň Milli Lideri Gahryman Arkadagymyzyň parasatly başlangyjy bilen türkmen ýaşlarynyň oňyn çözgütli ylmy taslama işleri ýurdumyzyň halk hojalygynyň dürli ugurlarynda giňden peýdalanylyp başlanyldy. Paýtagtymyz Aşgabatda gurlan ajaýyp binalaryň arasynda ýaş nesliň binagärlik taslama işleriniň bolmagy hem diýseň buýsandyryjydyr. Milli kärhanalarda daşary ýurtlardan getirilýän önümleriň ornuny tutýan önümleri oýlap tapyjylar hem, öndürijiler hem türkmen ýaşlary bolup durýar. Hut şu nukdaýnazardan-da, Gahryman Arkadagymyz işgärleriniň azyndan 75 göterimini ýaşlar düzýän döwlete dahylsyz kärhanalara «Ýaşlar kärhanasy» diýip atlandyrmaklyk baradaky oňyn başlangyjy öňe sürdi. Milli Liderimiziň bu başlangyjy Arkadagly Serdarymyz tarapyndan 2022-nji ýylyň 1-nji sentýabrynda Türkmenistanyň Magtymguly adyndaky Ýaşlar guramasynyň VII gurultaýynda tassyklanylan «Ýaşlar barada döwlet syýasaty hakynda» Türkmenistanyň Kanunyň rejelenen görnüşinde hem öz beýanyny tapýar. Munuň özi bolsa, Garaşsyz, baky Bitarap Türkmenistan Watanymyzyň ösüşine özleriniň mynasyp goşantlaryny goşýan türkmen ýaşlarynyň oňyn çözgütli ylmy taslama işlerine döwletimiz tarapyndan örän uly ähmiýet berilýändigini görkezýär. Çünki, ýurdumyzyň Garaşsyzlyk ýyllarynda häzirki zaman dünýäsiniň ruhy şertleri, ýokary talaplary esasynda kemala gelen türkmen ýaşlarynyň millilige ýugrulan kämil aňyýeti mukaddes Watanymyzyň ähli babatlardaky ösüşleriniň esasyny düzýär. Hut şu nukdaýnazardan-da, Arkadagly Serdarymyz tarapyndan ýaşlar syýasatyna döwlet syýasatynyň ileri tutulýan iň wajyp ugurlarynyň biri hökmünde aýratyn üns berilýär. 2022-nji ýylyň ýurdumyzda «Arkadag Serdarly bagtyýar ýaşlar ýyly» diýlip atlandyrylmagy hem, muňa aýdyň mysaldyr. Diýmek, Berkarar döwletimiziň täze eýýamynyň Galkynyşy döwri ýurdumyzda ýaşlar syýasatyny rowaçlandyryjy, örän ajaýyp döwürdir.
Döwletgeldi ATAÝEW,
Türkmenistanyň Telekommunikasiýalar we
informatika institutynyň talyby.
Teswirler
COOL