Täze ýyl baýramynyň şatlyk-şagalaňy halkymyzyň ajaýyp üstünlikleriniň, bagtyýar durmuşynyň, röwşen geljeginiň alamaty bolup, kalplara ýalkym saçýar. Asuda asmanyň astynda erkana ýaşaýan, ýürekleri joşgunly, ýüzleri şatlykly, gözleri mähirli ildeşlerimiz, ak mermere beslenen paýtagtymyzyň baýramçylyk keşbi, ajaýyp güllerden boglan sowgat çemeni mysaly gözüňi dokundyrýan Täze ýyl arçalary, olaryň töweregine dolan adamlary gurşap alan agzybirlik kalbyňda adaty bolmadyk ýakymly duýgulary döredýär. Şular ýaly pursatda halkymyzyň abadançylygy we ata Watanymyzyň gülläp ösmegi, arzyly arzuwlaryň hasyl bolýan ýurdunda döretmäge we zähmet çekmäge döredilen mümkinçilikler üçin Arkadagly Serdarymyza bildirilýän hoşallyk çäksizdir.
Täze ýyl baýramynyň waspy dilde dessan. Sebäbi bu baýram ynsanyň kalbyny joşa getirýär. Joşan ýürekden gaýnap çykýan ajaýyp gutlaglar bolsa hemmelere mähir, şatlyk paýlaýar. Ýene-de sanlyja günden Täze ýyl her birimiziň gapymyzy kakyp geler. Biziň ählijämiz bu baýrama uly sabyrsyzlyk bilen garaşýarys. Munuň üçin irginsiz aladalanyp, Täze ýyl saçagyny giňden ýazmaga howlukýarys.
Häzirden öýlerimizi, daş-töweregimizi yşyklar bilen ýagtyldyp, aýratyn bir öwüşgin çaýdyk. Ýurdumyzyň köçelerinden ýöräniňde-de Täze ýyl baýramynyň ýetip gelýändigini duýmak, görmek bolýar. Çünki, ata Watanymyzyň her bir künjeginde bezeg işleri geçirildi. Täze ýyl baýramyna taýýarlyk görüldi.
Geljekki 2023-nji ýyl hem ajaýyp üstünliklere, rowaçlyklara beslenýän ýyllaryň biri bolsun! Halkara gatnaşyklarynda-da hoşniýetli hyzmatdaşlyklaryň sanynyň artýan ýyly bolmagyny arzuwlaýarys.
Şu pursatda hormatly Prezidentimizi, ähli türkmen halkyny ýetip gelýän Täze ýyl baýramy bilen tüýs ýüregimizden gutlaýarys. Goý, 2023-nji ýyl düşümli ýyl bolsun!
Amansoltan MEREDOWA,
Ýagşygeldi Kakaýew adyndaky
Halkara nebit we gaz
uniwersitetiniň mugallymy.
Teswirler