Hormatly Prezidentimiz Serdar Berdimuhamedowyň parasatly baştutanlygynda milli ykdysadyýetimiziň kuwwatyny artdyrmak, önümçiligi ösdürmek, bäsdeşlige ukyply önümleri öndürmäge we çykarmaga gönükdirilen täze maglumat tehnologiýalaryny işjeň ornaşdyrmak, senagat we ylmy-tehniki mümkinçiligi artdyrmak babatda bitirilen işler bu gün özüniň oňyn netijelerini berýär.
Häzirki wagtda dünýä sanly ykdysadyýet döwrüne girip barýar. Sanly telekommunikasiýalaryň kömegi bilen emele gelýän bu ykdysadyýet ýagdaýy düýpli üýtgedýär.
Sanly ykdysadyýetiň esasy aýratynlygy az çykdajylar bilen oba hojalyk önümleriniň mukdaryny we hilini ýokarlandyrmakdan ybaratdyr. Maksat serişdeleri tygşytlamakdan, daşky gurşawa täsiri azaltmakdan we has köp hem gowy azyk önümlerini öndürmekden ybaratdyr. Sanly ykdysadyýetiň usullary, esasan hem, täze sensor tehnologiýalaryň, hemra nawigasiýasynyň, pozisionirleme, telematika we maglumatlary internet arkaly geçirmek tehnologiýasynyň utgaşygyna esaslanandyr.
Ýurdumyzda «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda, milli ykdysadyýetimiziň sanlylaşdyrylmagy, hususan-da, ýurdumyzyň oba hojalyk ulgamynda sanly özgertmeleriň giň möçberde amala aşyrylmagyna itergi berýär. Ýurdumyzda elektron pudagyň döredilmegi, taýýar harytlyk önümlerini öndürýän önümçilik kärhanalaryny diwersifikasiýa ýoly bilen üpjün etmegiň degişli ulgamynyň ösdürilmegi, milli ykdysadyýetimiziň has-da kuwwatlanmagyna oňyn täsirini ýetirer.
Hormatly Prezidentimiziň milli ykdysadyýetimizi sanly ulgama geçirmek babatdaky anyk, çuňňur oýlanyşykly we ylmy taýdan esaslandyrylan strategiýasynyň durmuşa geçirilmegi diňe bir ýurdumyzyň esasy ykdysady görkezijileriniň ösüş depginlerini ep-esli ýokarlandyrmaga ýardam etmek bilen çäklenmän, eýsem, milli ykdysadyýeti hil taýdan täze derejelere çykarmaga mümkinçilik berer.
Şirin DURDYÝEWA,
Türkmen döwlet maliýe institutynyň mugallymy.
Teswirler