Türkmenistanyň Daşary işler ministrliginiň Halkara gatnaşyklary institutyndaky “Hünärim-buýsanjym” atly sergi bäsleşigi gyzgalaňly ýagdaýda geçdi.
BMG-niň güni mynasybetli geçirilen bu sergä Halkara gatnaşyklary institutynyñ talyplary we mugallymlary bilen birlikde, paýtagtymyzdaky ýöriteleşdirilen mekdepleriň okuwçylary we mugallymlary, şol sanda dürli pudaklarda zähmet çekýän myhmanlar hem gatnaşdylar. Täsirli geçen sergä gatnaşyjylar sergi bäsleşigine ýokary baha berip, ýeňijini yglan etdiler.
Aşgabat şäher häkimliginiň 21-nji ýöriteleşdirilen terbiýeçilik-okuw mekdebiniň 11-nji synp okuwçysy Orazjemal Çaryýarowa:
“Institutyň baş binasynda geçirilen sergä synpdaş ýoldaşlarymyz, joralarymyz bilen gatnaşmaga geldik. Sergi bäsleşiginde institutyň Halkara gatnaşyklary, Halkara hukugy, Halkara ykdysady gatnaşyklary we Halkara žurnalistikasy fakultetiniň sergilerine tomaşa etdik. Olaryň arasynda has özüne çekiji, has täsirli taýýarlanylan Halkara hukugy fakultetiniň sergisi boldy. Ol ýerde kazyýete degişli kitaplary, kazylaryň geýimlerini we olaryň ulanýan esbaplaryny synladyk. Halkara hukukçy talyplaryň sport ýaryşlarynda, bilim olimpiadalarynda gazanan medallarydyr kuboklary özümi kämilleşdirmäge höweslendirdi. Şeýle-de jogapkär talyplardan “Parahatçylygyň ýaş çaparlary” bäsleşigi, II möwsüminiň guralyşy, oňa görülmeli taýýarlyklar barada peýdaly maglumatlary aldym. Bu institutyň gurnaýan bäsleşigine gatnaşmaga uly höwes bildirýärin. Sergä gatnaşmak meniň üçin uly bagt boldy “ diýip, ýürek buýsançlaryny beýan etdi.
Bäsleşigiň ahyrynda umumy ses bermekligiň netijesinde, Halkara hukugy fakultetiniň talyplary ýeňiji diýlip yglan edildi.
Şunlukda, baýrakly I orna Halkara hukugy fakulteti , II orna Halkara gatnaşyklary fakulteti, III orna Halkara ykdysady gatnaşyklary fakulteti mynasyp boldular. Ýeňijilere hormat hatlarydyr diplomlar dabaraly ýagdaýda gowşuryldy.
Kadyrmyrat Öwezgylyjow,
Türkmenistanyň Daşary Işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby
Teswirler