Häzirki wagtda ekologiýa howpsuzlygy, hususan-da, howanyň global üýtgemegi bilen baglanyşykly meseleleriň gaýra goýulman oňyn çözülmegi olaryň diňe bir sebitde däl, eýsem bütin dünýäde derwaýyslygy hem-de bütin adamzady tolgundyrýandygy bilen şertlendirilendir. Soňky onýyllyklarda howanyň üýtgemegi we onuň daşky gurşawa, ykdysadyýete we jemgyýete ýetirýän täsirleri halkara bileleşiginiň has möhüm ählumumy meseleleriniň birine öwrüldi.
Howanyň ählumumy üýtgemeleri adamyň hojalyk işi netijesinde howa ýaýraýan gazlaryň çalt artmagy bilen baglanyşyklydyr. Eýýäm häzirki döwürde Orta Aziýa sebitinde howanyň üýtgemeleriniň netijeleri, şol sanda gurakçylygyň we suw joşgunlarynyň sanynyň artmagy, daglardaky buzluklaryň eremegi, ygallaryň düşýän ýygylygynyň we mukdarynyň üýtgemegi duýulýar Munuň özi howanyň üýtgemegi bilen baglanyşykly meseleleri çözmekde dünýä bileleşiginiň tagallalarynyň birleşdirilmeginiň zerurdygyny aňladýar.
Howanyň üýtgemegi meselesi ýaly örän möhüm ugurlarda halkara gatnaşyklaryna işjeň gatnaşyjy bolmak bilen, Türkmenistan BMG-da oňyn hyzmatdaşlygy çuňlaşdyrmak we giňeltmek, beýleki iri guramalar hem-de düzümler bilen netjeli hyzmatdaşlygy ösdürmek ugrunda çykyş edip, tutuş adamzadyň geljegi bilen bagly bolan çözgütlere degişli özara gatnaşyklary sazlaşdyrmaga ýardam etmäge çalyşýar. Biologik köpdürlülik, Çölleşmä garşy göreş alyp barmak hakyndaky, Howanyň üýtgemegi baradaky, Ozon gatlagyny goramak baradaky, Serhetüsti suw akymlaryny we halkara kölleri goramak hem peýdalanmak hakyndaky BMG-niň biziň ýurdumyz tarapyndan tassyklanan tebigaty goraýyş konwensiýalary munuň aýdyň subutnamasydyr.
Tebigy serişdelerden jogapkärli peýdalanmak häzirki wagtda ýurtlaryň we halklaryň durnukly ösüşiniň ýeke-täk ýoludyr. Türkmenistan dünýä derejesinde ekologiýa başlangyçlaryny öňe sürmek bilen, halkara hyzmatdaşlygy üçin ygtybarly binýady döredýär, ählumumy meseleleriň çözgüdine uly goşant boljak öz gymmatly tejribesini toplaýar.
.
Ogulnabat Garlyýewa,
Balkan welaýatynyň Balkanabat şäheriniň
Tebigy ugurly derslere ýöriteleşdirilen
21-nji orta mekdebiniň mugallymy.
Teswirler