Häzirki wagtda ylmyň ösmegi bilen onuň köp sanly täze pudaklary, ugurlary emele gelmek bilen, çalt tizlik bilen durmuşymyza ornaşýar. Bu pudakda dörän täze ugurlar bolsa durmuşymyza ýeňillikleri eçilýär. Ynsan durmuşynyň her günki we geljekki kämilligi sanly ulgamyň mümkinçiliklerinde jemlenendir. Sanly ykdysadyýetiň bize eçilen ýeňilliklerinden ýerlikli peýdalandygyňça döwrümiziň ykdysady-syýasy ýagdaýy ösüşler bilen şöhratlanýar. Durmuşymyza ornaşdyrylýan kämil tehnologiýalar bu ulgamyň üstünlikleriniň aýdyň nyşanydyr.
Innowasion tehnologiýalaryň ösýän, kämilleşýän döwründe akylly enjamlaryň hyzmatyndan yzygiderli peýdalanmak gymmatly wagtymyzy tygşytly ulanmaga ýardam edýär. Sanly tehnologiýalar ulgamlaýyn özgertmeleri başdan geçirýän ykdysadyýetiň häzirki depginli badyny çaltlandyrmagyň özboluşly açarydyr. Bu ugur boýunça kämil hünärmenleri, ylmy-tehniki ösüşiň täze gazananlaryndan habarly ýaş nesli terbiýeläp ýetişdirmek ata Watanymyzyň at-abraýyny belende galdyrjak synmaz güýç bolup durýar. Sanly ulgamyň emeli aň, bulut tehnologiýasy, kiberhowpsuzlyk, startup, finteh, sanly lukmançylyk, sanly bilim, elektron-hökümet ýaly ugurlarynyň çalt depginli tehnologik ösüşiniň amala aşmagy üçin ulgamyň global häsiýeti we bu ugurdaky halkara hyzmatdaşlygy ýola goýmak zerurdyr. Dünýä ylmynyň netijeliligi, lukmançylyk, sport, medeni-durmuş we beýleki ähli pudaklar sanly ulgama esaslanýar. Sanlylaşdyrylan ulgama esaslanýan ylmyň gazananlary, önümçilik kärhanalary ýokary hilli, ekologiýa taýdan arassa önümçiligi ornaşdyrmaga şert döredýär. Ilatyň günsaýyn artýan islegleri hem sanly ulgamyň ýeten derejeleri bilen aýrylmaz baglanyşyklydyr.
Maksatnamalaýyn işleriň çäklerinde “Türkmenistanda internet torunyň ösüşini we internet hyzmatlaryny etmegi hukuk taýdan düzgünleşdirmek hakynda”, “Elektron resminama, elektron resminama dolanyşygy we sanly hyzmatlar hakynda”, “Kiberhowpsuzlyk hakynda”, “Maglumat we ony goramak hakynda” we beýleki kanunlar kabul edildi. Medeni-dynç alyş we beýleki merkezlerde, myhmanhanalarda, bilim ojaklarynda ýokary tizlikli internede girmäge şert döredýän Wi-Fi tehnologiýasy yzygider ornaşdyrylýar. Bilim ojaklary häzirkizaman multimediýa enjamlary, ösen tehnologiýalar bilen üpjün edilmek bilen, uzak aralykdan wideoşekilli ylmy-amaly maslahatlary amala aşyryp, özara tejribe alyşmaklyga giň ýol açýar. Günüň islendik wagtynda dünýäde, şol sanda diýarymyzda bolup geçýän wakalardyr-täzelikleri gyzgyny bilen bize ýetirýän köpçülikleýin habar beriş serişdeleriniň elektron saýtlarynyň döredilip, sanly görnüşe geçirilmegi maliýe çykdajylaryny azaltmaga ýardam edýär. Bularyň ählisi bolsa bagtyýar halkymyzyň abadan durmuşynyň kepili bolup hyzmat edýär.
Tyllagözel HUDAÝBERDIÝEWA,
S.Türkmenbaşy etrabynyň
Maliýe we ykdysadyýet bölüminiň
başlygynyň orunbasary
Teswirler