Barha rowaçlanýan ýurdumyzyň bank ulgamynda alnyp barylýan özgertmeler hemmetaraplaýyn goldawa mynasyp bolýar we halkara bilermenleri tarapyndan uly gyzyklanma döredýär. Dünýäniň abraýly maliýe düzümleri tarapyndan türkmen ykdysadyýetiniň geljekki ösüşine oňyn baha berilmegi bolsa ýurdumyzda amala aşyrylýan özgertmeleriň örän derwaýysdygyna we öz wagtynda ýerine ýetirilýändigine şaýatlyk edýär.
Häzirki döwürde biziň ýurdumyzda ykdysady ösüşde öňde goýlan sepgitlere üstünlikli ýetilmeginde döwlet maksatnamalarynyň ähmiýeti uludyr. Hormatly Prezidentimiziň baştutanlygynda ýurdumyzda üstünlikli durmuşa geçirilýän «Türkmenistanyň durmuş-ykdysady ösüşiniň 2011 — 2030-njy ýyllar üçin milli Maksatnamasyna», «Türkmenistanyň bank ulgamyny ösdürmegiň 2011 — 2030-njy ýyllar üçin Döwlet maksatnamasyna» esaslanyp, ýurdumyzyň ähli pudaklarynda, şeýle hem bank ulgamynda düýpli öňegidişlikleri gazanmaga, ähli pudaklary ösen döwletleriň derejesine ýetirmäge, işleriň we hyzmatlaryň hilini geljekde hem has-da ýokarlandyrmaga giň ýol açylýar.
Ýurdumyzda nagt däl hasaplaşyklaryň gerimini giňeltmek, bank kartlaryndan peýdalanyjylara hödürlenilýän hyzmatlaryň görnüşlerini artdyrmak hem-de bank ulgamyna döwrebap hyzmatlary ornaşdyrmak maksady bilen geçirilýän işleriň çäklerinde bank kartlarynyň üsti bilen, hakyky wagt tertibinde hasaplaşyklary geçirmek üçin internet-bank ulgamy taýýarlanyldy. Ýurdumyzyň karz edaralary tarapyndan «Mobil-bank» (telefon arkaly, banka barmazdan tölegleri tölemek we beýleki hyzmatlar) hyzmatyny ýola goýmak boýunça hem ähli mümkinçilikler döredilýär. Bu hyzmat hem edil «Internet-bank» hyzmaty ýaly müşderilere amatlylyklary döredýär.
Türkmenistanyň bank ulgamyna sanly tehnologiýalary ornaşdyrmak boýunça alnyp barylýan giň gerimli işleriň çäginde bank hyzmatlarynyň täze görnüşleri yzygiderli ildeşlerimize hödürlenip, milli töleg ulgamynyň mümkinçilikleri artdyrylyp, ýurdumyzyň karz edaralarynyň bäsdeşlige ukyplylygy ýokarlandyrylýar.
Allanur ALLABERDIÝEW,
Türkmen döwlet ykdysadyýet we
dolandyryş institutynyň talyby.
Teswirler