Bütindünýä ösüş maglumat güni, dünýä jemgyýetçiliginiň pikirini ösüş meselelerine we olary çözmek üçin halkara hyzmatdaşlygyny güýçlendirmek maksady bilen 1972-nji ýylyň dekabrynda Birleşen Milletler Guramasynyň Baş Assambleýasynyň 3038 (XXVII) karary bilen döredilýär. Mejlis bu günüň senesini Birleşen Milletler Guramasynyň döredilen güni bilen baglanyşdyryp, ýagny – 24-nji oktýabrda bellenilmeli diýen karara gelipdir.
Bütindünýä maglumat ösüş güni, soňra Birleşen Milletler Guramasynyň ösüş onýyllygy üçin halkara ösüş strategiýasynyň 1970-nji ýylda kabul edilen senesi hökmünde bellenilýär. Bu strategiýanyň esasy düşünjesi bolsa, syýasat, ykdysadyýet, jemgyýetçilik ýaly ýurduň möhüm meselelerini çözmekden ybaratdyr. Mejlis, maglumatlaryň ýaýramagyny gowulandyrmak we jemgyýetçilik pikirini mobilizirlemek, esasanam ýaşlaryň arasynda ösüş meselelerine has gowy düşünmek üçin möhüm faktor bolup, ösüş tagallalary üçin halkara hyzmatdaşlygyny pugtalandyrmaga öz ynamyny bildirýär.
Şeýle-de 2005-nji ýyldan 2014-nji ýyla çenli Birleşen Milletler Guramasy tarapyndan Durnukly ösüş üçin bilim onýyllygy hökmünde bellendi. Galyberse-de, bilim maglumat almagyň esasy usullaryndan biridir, ýöne onuň hilini we ýerlikliligini göz öňünde tutmak wajypdyr. Şonuň üçin bilim we maglumat tutuş dünýä jemgyýetçiligi üçin örän möhümdir.
Maglumat we aragatnaşyk tehnologiýalary, globallaşma şertlerinde ösüş meselelerine täze çözgütler berip biler hem-de ykdysady ösüşe, bäsdeşlige ukyplylyga, maglumat we bilime elýeterlilige, garyplygy aradan aýyrmaklyk ýaly meselelerini öz içine alýar.
Ýeri gelende bellemeli zatlaryň ýene-de biri, köplenç jemgyýetçilik pikirini emele getirýän köpçülikleýin habar beriş serişdeleri bu meselelerde deň derejede möhüm rol oýnaýar. Şonuň üçin Birleşen Milletler Guramasynyň agzalary: “Habar beriş serişdeleriniň esasy wezipesi päsgelçiliksiz obýektiw we takyk maglumatlary bermekden ybaratdyr” diýip belleýärler.
.
Şasenem HAÝTBAÝEWA,
Türkmenistanyň Daşary işler ministrliginiň
Halkara gatnaşyklary institutynyň talyby.
Teswirler