Şu gün Türkmenistanyň Döwlet migrasiýa gullugy tarapyndan Türkmenistanyň raýatlygyna kabul edilen adamlara pasport gowşurylyş dabarasy geçirildi.
Türkmenistanyň Prezidenti Gurbanguly Berdimuhamedowyň 19-njy sentýabrda gol çeken kararyna laýyklykda, ýurdumyzda hemişelik ýaşaýan, 21 milletiň wekili bolan 2657 adam Türkmenistanyň raýaty boldy. Mundan başga-da, döwlet Baştutanynyň kararyna laýyklykda, daşary ýurt döwletleriniň raýaty bolan 406 adama Türkmenistanda ýaşamak üçin rugsatnama berildi.
Mälim bolşy ýaly, Türkmenistan soňky ýyllarda käbir sebäplere we ýagdaýlara görä öýlerini terk etmäge mejbur bolan müňlerçe adamyň ikinji öýüne öwrüldi. Migrasiýa meseleleriniň milli derejesinde kanuny düzgünleşdirmegiň ähmiýetini göz öňünde tutup, ýurt migrantlaryň, bosgunlaryň we raýatlygy bolmadyk adamlaryň kanuny ýagdaýyny kadalaşdyrýan we olaryň hukuklaryny we azatlyklaryny kepillendirýän kanunçylyk kanunlaryny kabul etdi.
Raýatlyga kabul edilenleriň köpüsi özbekler (1775 adam) bolup galanlary gazak, azerbaýjan, rus we ukrain, ermeni, koreý, eýran, türk we ş.m. milletlerden ybarat bolup durýar.
Ýyllara salgylansak:
- 2005-nji ýylda 10158 sany Täjigistan Respublikasynyň ozalky raýatlary;
- 2005-nji ýylda 3029 sany raýatlygy bolmadyk adam;
- 2011-nji ýylda 3318 sany raýatlygy bolmadyk adam;
- 2013-nji ýylda 609 sany raýatlygy bolmadyk adam;
- 2014-nji ýylda 786 sany raýatlygy bolmadyk adam;
- 2015-nji ýylda 361 sany raýatlygy bolmadyk adam;
- 2016-njy ýylda 1381 sany raýatlygy bolmadyk adam;
- 2017-nji ýylda 1690 sany raýatlygy bolmadyk adam;
- 2018-nji ýylda 735 sany raýatlygy bolmadyk adam;
- 2019-njy ýylda 863 sany raýatlygy bolmadyk adam;
- 2020-nji ýylda 2580 sany raýatlygy bolmadyk adam;
- 2021-nji ýylda bolsa 2657 sany raýatlygy bolmadyk adam – Türkmenistanyň raýatlygyna kabul edildi.
Atajan EÝÝUPOW,
habarçy, žurnalist.
Teswirler